樓市出更：恒隆密密沽大刁又一單

外圍經濟有暗湧，但係本港逾億元大刁物業成交就無停過，近排頻頻出貨套現嘅恒隆地產（00101）或有關公司，今年到依家賣出同埋獲洽嘅物業加埋有5項，涉及金額近40億元。其中啱啱賣咗嘅長沙灣百佳商業中心全幢寫字樓，成交價約6.25億元，呎價只係4,400多元，喺區內算係「筍價」，買家公司董事包括有近期活躍入市嘅「燈芯絨大王」江達可。

劉Sir啱啱喺土地註冊處搵到料，發現恒隆地產等全資擁有嘅長沙灣青山公路476號百佳商業中心地下至21樓，簽訂臨時買賣合約，悉數以6.25億元賣咗，原業主係RONHERO LIMITED，間公司係恒隆地產全資擁有嘅，上址九三年錄成交登記金額3.3億元。不過，有老友話，該廈原本係工業用途，其後成功補錢改做寫字樓用途，所以計唔到是次易手，帳面係執幾多。

「燈芯絨大王」公司接貨

其實恒隆地產出貨早喺今年初已露端倪，該公司沽出天后栢景臺共50個車位及一批商舖，涉資約2.2億元，三月份緊接以逾5.2億元賣出葵涌紅A中心全幢予「舖王」鄧成波。

另外，恒隆地產位於藍田嘅麗港城商場同荃灣汀蘭居，都分別獲買家出價洽購，涉資逾15億元及逾10億元。劉Sir覺得恒隆地產今年積極出貨套現，可能係想重返本港地產發展市場。

至於今次百佳商業中心嘅買家公司係麗匯發展，劉Sir睇番公司註冊處資料，間公司董事包括「燈芯絨大王」江達可及陳淑儀，註冊地址係九龍灣企業廣場3期，即係江生喺香港公司註冊地址。佢本月初亦買入九龍灣美羅中心2期18樓全層，涉資9,000多萬元。

宏安五千萬沽沙田舖

好多上市公司都趁市旺出貨，宏安集團（01222）沽出沙田居屋富嘉花園地下23號舖，涉額5,030萬元，以銷售面積約237方呎計，呎價超過21萬元，係該區新指標。據悉上址現由代理以12.3萬元租用，收租約2.9厘。

另一方面，東方表行（00398）早前公布，以8,680萬元售後租回中環德輔道中160號C座地下及閣樓，實用面積呎價大約10萬元。