股海實戰：中信証券毋須睇太淡

港股陰晴不定，相信能捕捉升跌浪日日賺錢嘅人唔多，反而指數日上日落，缸邊友容易消耗實力，最終被迫離場。之後大市方向係點，當然係有錢人話事！參考恒指走勢，短線向上主要阻力仍喺250日線19,737點，支持區則喺19,000點。上落市經已行咗個幾月，希望第三季中前大方向會漸趨明朗。

家電股夏日大清貨，繼早前TCL多媒體（01070）遭洗倉後，已為中報響警鐘嘅國美電器（00493）股價繼續尋底，尋日曾低見0.84元。其實公司開發新業務拖低盈利只會係中短期問題，資產點都有個價，但股價何處是底？自是小股東最關心嘅問題。

近期保監會高層表示，將推出多項新法，進一步放寬保險資金投資債券、股權和不動產嘅品種、範圍和比例嘅限制，允許保險企業委託有關金融機構進行投資。呢幾日心思思想買中國人壽（02628），尋日忍唔住手以平均價21.8元買入1萬股。

大戶重整投資組合

阿莊喺度諗，呢兩、三個月中企股板塊輪流洗倉，電訊股先跌，跟住係內銀、水泥、體育用品、電訊設備、家電…。直至近期，弱咗好耐嘅國壽開始見到有轉勢迹象，中資券商股亦唔多跌得落，電訊及煤炭股亦開始築底，似乎係大戶為迎接新一輪走勢，對投資組合去蕪存菁。

尋日A股券商股有異動，事緣上周A股新增開戶數目環比回升，加上市場憧憬今日人行可能會下調RRR。此外，官媒文章以「重建信心方能迎來股市春天」為題，顯示官方亦關注資金持續流出，市場信心低迷，股市可能會「過分」反應。究竟政府會如何「重建信心」，相信未來兩個月自有分曉，率先受惠股市回春嘅券商股可納入觀察名單。

事實上，阿莊早前都講過，未來內地金融政策會向證券行業傾斜，券商業務創新將成主流。中信証券（06030）現價已反映上半年受市況拖累核心盈利倒退嘅因素，但期間公司市佔率擴大，且正物色購併對象。

此外，由於去年股指先高後低，今年下半年券商核心盈利比較基數應該較低 ，加上現時股指已處於低水平，配合下半年銀根放鬆，可為業績反彈造就有利條件，故毋須過分睇淡其股價表現，料短期可維持喺14至16元水平上落，靜候股市春天重臨！