樓市出更：擺花街超旺難怪爭舖

在國際名店搶租中環一線地舖效應下，區內明日之星嘅擺花街，近排有唔少演藝界名人落區尋寶買舖，就連買開全幢酒店物業，甚少買地起樓嘅資深投資者羅家寶（Lobo），都心郁郁早前連約買入擺花街26號地舖同埋閣樓，涉及金額8,900萬元，呎價差唔多6萬幾蚊。由於間舖依家有時裝店租緊，聽講已經有個收租佬想以約1.1億多元，打動業主割愛，若成交屬實嘅話，Lobo幾個星期帳面速袋超過2,000萬元，賺幅近24%。

劉sir認識Lobo好耐，知佢向來都係投資全層或者全幢物業為主，據土地註冊處啲資料，上述擺花街26號地舖同埋閣樓，上月中左右賣咗8,900萬元，買家公司係嘉亨泰有限公司，公司註冊處登記資料顯示董事係Lobo。

地舖搶手 藝人輪住掃

有代理同劉sir講，個舖依家由時裝店租緊，附近商戶都係高檔時裝店同埋高級餐飲，所以條街嘅舖頭生意唔錯。佢仲爆料話，有個收租佬想向Lobo洽購上址，出價都好重手，大約1.1億元，希望打動業主摸出。

近月擺花街地舖超旺，上個月擺花街22號舖以約5,400萬元賣咗，個買家公司董事叫做古巨基，同本港人氣歌手同名同姓。

另外市場都有人話，一位歌影視藝人花咗逾9,000萬元，買咗擺花街一個雙號地舖，依家上述兩個地舖都吉咗，相信新買家會有新打算。另同街嘅1號壹號廣場地下低層地下1號，啱啱以5,068萬元賣出。

舖市大旺，唔少二線區舖位業主都吼準機會出貨套現，香港置業林偉文話，西灣河街82至84號地下B及C舖，連同老牌海鮮飯店租約，以大約5,680萬元賣咗，原業主揸咗個舖近三十年，依家帳面大賺約5,400萬元，賺幅超過十九倍。

太興全幢叫價逾五億

近排全幢物業幾搶手，加連威老道早排有幢商用物業以超過10億元賣咗，同街39至41號太興商業大廈全幢亦趁機放售，溥頓亞洲有老友話，上址由老牌家族持有，早喺○七年以3.5億元購入，依家意向價大約5.5億元左右，較購入價升咗57%。物業由地下至17樓組成，地下至3樓係零售樓層，樓上係寫字樓用途。