Fundman睇市:內房股最驚樓市太好

伯南克前晚在國會聽證會發表講話,對於大家關注嘅放水時間表,只係模棱兩可輕輕帶過,無話有,亦無話冇。偷步炒QE3的港股行三步退兩步,恒指尋日跌215點,報19,239點,主板成交和周二相若,可是沽空佔比由9.2%回升至11.3%,反映淡友相對稍為積極。昨日個市特色係跌勢全面,煤炭、電訊設備、水泥股通通無運行。

尋日國統局公布六月份70個大中城市新建商品住宅價格,按月有25個升,21個跌,24個持平,人行連環放水開始起到推波助瀾作用,國統局在數據公布後,特別強調目前調控成果未夠穩固,措施唔可以放鬆,基金一個唔該,借嚟作為獲利回吐嘅理由,潤地(01109)及中國海外(00688)分別跌5.9%及4%,攜手成為藍籌表現最差股份。內房股捧場客,求神拜佛未來幾個月國統局數據最好係量升價唔升,以免在十八大之前,再度觸動中央壓抑樓價嘅決心。

特首搞居屋「抽獎」計劃,每年有五千幸運兒,年輕朋友問,點可以迅速由股市累積財富,以備日後上車需要?老實講,今時唔同往日,港股八、九十年代,多得中港兩地經濟起飛,機會確實比現時多,過去廿幾年,筆者親身經歷九十年代工業股、莊家股、之後地產熱、紅籌注資概念及二千年科網股等概念。反觀今日,中國經濟神話受考驗,中央認清形勢調節經濟增長,重質多於重量,本地上市企業也呈現經濟發展成熟地區常見的滯悶情況,再看不到短期有機會出現一個全(股)民參與的當炒概念。

今日炒股唔炒市年代,游資四圍搵短期停泊處,在不同板塊中穿梭搵食,舉個例,今年死抱內銀股卻同內房絕緣,回報肯定唔理想,要繼續在股壇制勝,一要摒除一夜致富的想法,更要多留意經濟新聞,最好能每兩個月審視各類股份前景及資金流向。

創科憧憬業績改善

近兩三個月,美國新屋銷售數據都比市場預期好,經歷五年調整,按揭息率剛創歷史新低,美國樓市有迹象出現小陽春,亦直接令人想起最能受惠於美國樓市的創科(00669)。

創科主要在北美產銷建屋及裝修用的電動工具,北美新屋動工及銷售數據,也成為基金預測創科表現的寒暑表。經過兩年重組業務及品牌營銷策略,去年盈利基數低的創科,今年業績不難有較大幅度改善。旗下幾個知名電動工具品牌Milwaukeer及AEGR等產地遷移的好處,也可望逐步浮現在未來幾年業績上。

過去半年,創科股價在8.5至10.5元之間牛皮上落,昨日午後突見異動,抽升0.46元,見9.9元,可惜成交未算配合,且看買盤是否即日鮮咁短癮。惟以基本條件及目前估值,創科股價向上機會仲係要比向下高得多,不妨密切留意短期股價走勢。

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!

史提芬