股海實戰：電力股宜逢高減磅

六月份內地七十個大中城市超過三成房價環比上漲，官媒立即開腔，話要提防「穩增長」政策下，房地產借機漲價，故見尋日內房股不但未受數據消息刺激，反而普遍受壓，潤地（01109）、中國海外（00688）、保利（00119）同世房（00813），跌幅介乎3至5%。睇嚟喺阿爺嘅密切監察下，依賴土地收入作為財政來源嘅地方政府，想借故放鬆樓市調控嘅如意算盤打唔響！

華創已屆買貨水平

尋日阿莊話華創（00291）喺20元樓下可考慮分注收集，話咁快穿過20元，低位見19.88元，收報20.1元，跌2.6%。咁啱花旗亦發報告，維持建議買入華創，原因係其現價僅反映啤酒業務價值，買入等於「買啤酒送零售」。另外，尋日提到表現「獨弱」嘅新華保險（01336），連27蚊關都失守，暫宜繼續觀望低位承接。

話冇股好炒，可能會畀人鬧，事關呢幾日升幅榜某股仔日日升兩、三成，成交過億股。之不過，有經歷過手持股仔炒高過後供供合合，結果變得一文不值嘅股民，應深明「便宜莫貪」嘅道理！大淡市見到有股仔球來球往兼股價日日升，確容易令人心動，但阿莊奉勸看官沾手前先諗諗，有冇咁大隻蛤乸隨街跳？

睇來睇去，內地煤價疲弱，電企成本下降，加上電力需求正處旺季，電力股可謂時勢做英雄！尋日跌市，見到大唐發電（00991）升2.5%、華能（00902）升1%、華電（01071）升3%，中國電力（02380）同潤電（00836）股價均處一年高位。

論電力股，阿莊首選仍然係潤電，但正由於其股價受周期性影響略較同業細，故在本輪電力股大反攻中，升幅反未及華能和華電。無論如何，季內煤價有機會見底，唔排除電力股炒埋呢個旺季就會進入調整期，到明年先再炒加電費，持貨者可考慮逢高減磅，靜候收集大型煤炭股嘅機會。