樓市出更：將軍澳地靜靜雞添伙數

政府增加住宅單位嘅決心未見動搖，地政總署剛公布標售日期嘅兩幅住宅地皮，其中將軍澳第66C2區要求限建單位上限546伙，比之前多咗26個，增幅約半成，數目雖然唔多，但反映到政府增加住宅供應嘅決心，該地皮係將軍澳南第一幅推出嘅臨海地，市場估計地價比早前新地（00016）投到嘅貼鄰地皮高逾一成，每方呎樓面地價最多約4,600元。

地政總署尋日公布將軍澳第66C2區及坪洲東灣B地盤將會响下月十七日招標，截標日期為九月二十一日。劉Sir發現，今次呢幅將軍澳限量地，政府唔聲唔聲咁增加單位供應，最新單位限制為不少於520至不多於546伙，即係上限比之前多咗26個，計番大概5%，雖則唔算加好多，但係反映到政府增加供應嘅決心。

唔好話劉Sir事後孔明，其實呢幅將軍澳地皮被納入今季賣地計劃時，地政總署網頁已經抽起咗原先份出售章程，話唔定未公布招標日期嘅將軍澳第66D2區同馬鞍山落禾沙兩幅限量地，最後限建單位數目多咗都唔奇，即管拭目以待。

地皮臨海估值近22億

講番今次招標嘅將軍澳限量地，老友高緯環球張翹楚話，由於地皮位置臨海，相信價值會高於以往售出嘅同區地皮，佢估計每方呎樓面地價約4,500元，即係估值約21.9億元。而現時市場估值上限呎價約4,600元，比起隔籬由新地於五月份投得嘅貼鄰地皮呎價約4,009元，高出約14.7%，相信新地一定有興趣投埋呢幅臨海地合併發展。

而同喺九月截標嘅坪洲東灣B地盤，啱啱上月個先錄得財團試勾被拒紀錄，係邊間財團試勾就唔知，不過相信反應會幾熱烈，因為鄰近嗰幅坪洲東灣A地盤，錄得多達30份標書競投，今次呢幅實唔會差，市場估計地皮每方呎樓面地價大約700至1,392元左右。

上述坪洲東灣B地盤估值約1,010萬至2,000萬元，估計兩幅土地最多可為庫房進帳約22.58億元。