Fundman睇市：中興暗藏風險博唔過

第二季中國GDP增長回落至7.6%，創下○九年以來新低。回顧第一季，大家一廂情願預期第二季內地經濟及企業盈利見底，五月滑鐵盧歷歷在目。前車可鑑，近期股市步步為營，中央連環放水兼減息，顯示對支持經濟增長的決心，但A股及中資股一樣弱勢難改，市場對前景徹底死心，或者黎明前一刻確實特別黑暗。

昨日財政部公布，上半年國有企業累計實現營業總收入19.8萬億元（人民幣．下同），按年跌11.1%，利潤1.02萬億，跌11.6%，實現利潤跌幅較大的行業包括交通、化工、有色金屬、石化、建材行業等；增幅較大則有煙草、汽車、郵電通訊等。值得留意，六月比起五月，國有企業環比收入及利潤分別有8.8%及16%的反彈，營收初步有觸底迹象。

國企指數見底在望

國指今年表現遜於恒指，年初至今兩者分別跌7.2%及升3.7%，回顧過去好景時，國企指數平均市盈率可以去到20至25倍水平，像○六年及○九年4萬億救市計劃推出後，差勁的○二年、○八年金融海嘯，亦可低於10倍樓下。現時國指市盈率大約8.1倍，市場把今年利潤倒退、銀行業暴利時代結束等因素，一併計入國指的合理估值上。或者看官要一入市即有收穫，太過勉強，可是按經濟發展趨勢，如果分注在未來三季入市，成功捕捉經濟調整周期的機率則可望大為提高。

美股上周五反彈超過200點，可惜塘水滾塘魚的港股，基金博反彈意欲唔大，主板成交跌至352億（港元．下同），股市都想等埋周二、三伯南克發表半年貨幣政策報告，睇吓有冇QE3至算，等運到的市況持續。

中興（00763）發盈警，估計上半年業績要倒退六至八成，股價被插低一成六，見10.46元。由年初24.4元計，今年累積跌五成七。分析員一沉百踩，本來平常不過，不過今次真係睇唔過眼，環顧中興倒退三個成因，出售資產的一次性收入減少、交易的匯兌收入變虧損（主要來自歐元結算收入），就算唔發盈警，精明多少都應該一早估到，兩條數一來一回，中期業績大跌在所難免。至於第三點，電訊設備毛利不及預期，分析員更是無理由不聞不問，今日先唱衰。

過去兩年中興因為印度3G設備出口概念被熱捧，要知當地競投牌照去年底搞出大頭佛，營運商更因為投得頻譜不足，威脅退還牌照，中興張最後王牌早就危危乎。諷刺係去到盈警前夕，上星期五居然71%有畀意見的大行，都建議客仔買入，平均目標價21.49元（刻下回落到61%及18.88元），尋日才出來把目標價削到9至15元，已於事無補。可能因為分析員想自圓其說，故綜觀不少調整後的預測盈利，還是流於樂觀，也隱藏了博反彈的風險。