股海實戰：TCL系不宜胡亂撈底

溫爺爺話當前經濟尚未形成穩定回升態勢，經濟困難可能還會持續一段時間，加埋中證監話籌建新三板有實際性進展，市場擔心擴容將進一步抽緊銀根，滬綜指失守上周低位，收市跌37.9點，報2,147點，乃○九年三月以來收市新低。不過，消息指國務院年中經濟會議將於本周三召開，不排除會後中央又有新嘅刺激經濟措施出台，故見尋日港股雖反覆走軟，但實際上沽壓不太大，全日大市成交僅353億元，恒指收報19,121點，升28點，期指低水33點。

市況慘淡卜架發愁

今年魚缸唔單只唔聚財，是是非非亦特別多。無論藍籌、民企、國企都唔例外。大市成交日日得三、四百億，金融從業員日子自然唔好過，基金經理若然只懂「Buy and hold」，旗下基金十居其九損手爛腳；唔少小型對沖基金經已捱唔住關門大吉，就連一向較少炒人嘅中資行，聽講都話要減人，卜架們正為年尾交數發愁。驟眼睇落，市場悲情指數係自○八年海嘯初期以來新高，偏偏股指仍未有見底迹象，難怪連老行家都話，今次大淡市真係幾十年都未見過！

五月下旬阿莊話唔好心急撈底嘅中興通訊（00763），股價不斷尋底，尋日響埋警鐘，股價曾低見10.32元，收報10.46元，跌幅16%。今年以來市值經已蒸發半百億元，估值低迷，但最近兩地券商唔手軟，進一步調低手機股估值，難怪板塊氣氛到達冰點！

其實唔單只中興，京信通信（02342）、TCL通訊（02618）同聯想（00992），呢期都做晒跳水隊成員！講到TCL通訊，尋日發盈警，股價即插12%。同系嘅TCL多媒體（01070），上周五無情情插近一成，尋日發盈喜，股價都冇得彈，再跌1.4%收市，沽壓之大，走勢之弱，實在唔多尋常。

阿莊四出打聽，確有對沖基金在力沽TCL多媒體，理由係同傳聞內地部門正嚴查節能家電行業中，有幾多產品係真正「節能」有關，消息是否屬實不得而知，但呢期缸邊友心血少，一聽見風聲唔對沽貨套現自保。

銷售前景有欠明朗

雖然TCL一門二傑股價已大幅度調整，技術上已進入超賣區，但阿莊仍不建議撈底，事關針對TCL通訊，短期仍受行業估值下調及銷售前景未明困擾；至於TCL多媒體，尚未確切找到沽壓大增嘅原因，加上發盈喜股價都彈唔起，就要加倍小心。正所謂「莫買當頭跌」，與其玩火中取栗，倒不如坐定定睇埋周內國務院會議消息，（目及）實今日見報推介嘅國壽（02628）表現仲實際！