樓市出更：坪洲兩地臨近賣照勾

政府季季有地推，發展商勾地意欲少咗，不過，啱啱收到地政總署最新數據，話上個月錄到兩宗拒勾個案，打破連續八個月「零拒勾」悶局，點知嗰兩宗個案，居然係政府今季主動推出嘅坪洲商住地同埋坪洲東灣B地盤，政府五月底已經公布咗會响今季推，試勾已納入賣地計劃嘅地皮真係聞所未聞。劉Sir相信喺附近已經「插旗」嘅信置（00083）試勾機會好大。

地政總署尋日公布，上月錄得兩宗拒勾申請個案，分別係坪洲丈量約份地段第678號商住地同埋坪洲東灣B地盤，呢兩幅地早喺五月底已經納入咗今季賣地計劃中，前者仲會喺今個星期五招標，下月二十四日截標。

今次有財團試勾賣地計劃入面嘅地皮，屬歷來首次，地政總署發言人就話，佢哋處理勾地有既定程序，今次拒勾都係未接納勾地條件咁話。不過，劉Sir真心相信呢家財團對地皮志在必得，推測今年三月投得坪洲坪利路住宅地嘅信置勾地動機較大，投埋上述坪洲商住地就可以合併發展。

補價收入季減62%

另一方面，地政總署都公布埋上季補地價收入金額約1.52213億元，按季減少約62.2%，創○九年第二季後新低，而上月最新公布嘅補地價個案，包括由旭日國際主席蔡志明持有嘅KCP九龍城廣場補價項目，補地價金額8,678萬元，係上季最大宗單一補價項目。

蔡志明向劉Sir爆料，話今次補地價係因為項目1樓及3樓戲院部分，以及地庫二層停車場轉為零售用途。另該署亦公布元朗牛潭尾一幅逾2.7萬方呎政府地亦以3,364萬元完成補地價。

此外，再有業主成功活化旗下工廈項目以增加競爭力，上月地政總署亦錄1宗簽立特別豁免書個案，項目為長沙灣道788號，准改裝做食肆、寫字樓或娛樂場所等多功能用途。