Fundman睇市:高息股成資金避風港

十個牛皮九個淡,尋日港股即市高低位,未到十一點經已先後出現,全日168點波幅,收市跌31點,報19,396點,主板成交得378億。唯一要留意係沽空連升兩日,升上11.4%,後市挾淡倉機會稍增。

受內地貿易數據拖累,港股與內地股市雙雙腳軟,六月內地出口增長11.3%,比預期的10.6%高,如果以一至五月份累積8.7%增長比較,亦唔算曳,但進口增長6.3%,唔及五月份12.7%的一半,亦同投行預測增長11%有段距離,反映內地進口需求減少,加埋PPI已經連續四個月出現負增長,估計中國短期面對通縮重臨的風險要比通脹重燃大,減RRR與減息的行動,相信仲會陸續有來。

隨着內地第二季令人失望的經濟數據陸續出台,愈來愈多名嘴開始認低威話睇錯市,亦將復甦預期押後到第三甚至第四季至出現,加埋歐洲央行解決歐豬國債務危機顯得唔湯唔水,意、西十年國債息持續貼實6、7厘警戒線水平,壓抑基金風險胃納,四圍搵安全兼高息的股份泊住先,集中本地電訊業務的和電(00215)及數碼通(00315),終於發威,現價計預期股息率仲有4.3及5.7厘,在避險情緒持續下,短期相信是易升難跌。

另外,受惠內地通脹及食品價格回落的快餐股,都見追捧,心水股大快活(00052)創超過十年新高,估值處歷史高位,揸貨的未必要即時食胡,但要買上去就要相當大的勇氣。領匯(00823)創新高,預期息率降至大約4厘,本來管理私人屋苑商場的置富產業(00778)都唔錯,一樣係純本地生意,較不受外圍經濟風高浪急拖累,不過基金掃貨向來唔大唔買,市值細難免吃虧啲啲。

奶粉股雅士利(01230),一年多前上市集資19.65億(人民幣.下同),睇去年年報,除咗一筆1.8億的「其他投資」外,其餘17億幾現金仲曬緊太陽。尋日公司話將唔超過5億元集資所得款項,用作短期保本產品投資,另外,非發新股所得的15億,也會投資在一年內到期的保本產品。

雅士利價低未必抵

唔經唔覺,雅士利由招股價4.2港元,三碗煲埋一碗水得番1.24港元。以手上25.8億淨現金計,每股有0.73元,相當於現價逾七成係現金。雖然同胞少咗嚟香港買LV,但奶粉卻依然搶手,內地消費者對國產奶粉信心有幾低可見一斑。即使貴為內地五大品牌,雅士利不脫上市走樣法則,去年少賺39%,得3.06億,撇除大額存款收息所得,實質要跌47%。

剔除現金後,雅士利PE得兩、三倍,價值投資者可能覺得抵買,不過保本投資係咪真係保本?八月份中期業績有幾差?都係未知之數。光棍佬教仔便宜莫貪,就算忍唔到手,都只宜細細注。

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!

史提芬