股海實戰：港鐵防守概念失色

炎炎夏日，兩地魚缸已進入「抖暑」狀態，恒指全日波幅不到兩百點，成交只有379億元。最近遇上批中○八年大冧市、精於研究紫微卜數嘅老友記，聽佢講炒埋呢兩三個月，到十一月先至係今年嘅危機所在。阿莊聽後頗感沮喪，皆因感到眼前境況經已好差，仲要再差，真係冇眼睇！

尋日提及嘅領匯（00823）股價曾高見33.85元，收報33.657元，逆市升2.4%。不過，分屬公用股嘅中電（00002）就一反常態，股價插逾2.6%，低位曾見65.35元，相信與公司披露今年業績將受澳洲煤礦場水浸影響有關。既然連公用股最重要嘅「收益穩定」特點都褪色，股價受壓在所難免。

發展商抱審慎態度

港鐵（00066）大圍站上蓋商住項目又再流標，乃繼西鐵南昌站及荃灣西站項目後再有招標項目流標，本來預計可供應市場嘅約三千伙單位泡湯。事件反映發展商對樓市前景態度審慎；但從另一角度睇，流標將打亂政府增加樓市供應嘅預算，有助托住樓價，故出嚟嘅結果可以算係中性。

至於對港鐵影響則偏向負面，皆因旗下項目連番流標，將令公司嘅物業發展收益前景添上不明朗因素，加上為應對流標，日後公司在重新招標相關項目時，可能需要縮減發展規模又或拆細項目，甚而以減少分紅來吸引發展商參與，所以點睇都唔係好事。

除咗推進上蓋物業發展項目進度未如人意之外，早前港鐵調升票價惹來社會頗大反響，結果要以增加優惠來平息，一來拖低了預測盈利，二來亦顯示可加可減機制成效要打個折，兩者足以令港鐵防守性失色。至於話日後政府會否回購港鐵股份，阿莊始終認為炒呢個概念唔多實際，倒不如寄望港鐵加快發展內地市場嘅步伐，藉此減少對香港市場嘅依賴。

最近國家領導人訪港，提到喺經貿合作方面，將協助內地與香港企業聯合「走出去」，並支持珠三角地區嘅港口、機場及軌道交通之間嘅銜接及合作，不妨留意呢方面能否為港鐵帶來新嘅發展機遇。