樓市出更：SSD盤大解放成交破頂

五、六月份樓市雖然轉靜，但整體樓價仍見續升，令到唔少二○一○年住宅額外印花稅（SSD）實施後入市嘅業主，終於可以賺錢賣樓套現，單係六月份就有約139宗須付SSD成交個案，涉及稅款達約2,500萬元，兩個數字都係措施推出以來嘅新高，其中稅款金額比五月份急升超過40%。

政府發言人同劉Sir講，六月份嘅二手住宅買賣中，有約139宗需要繳付SSD，創咗措施推出以來嘅新高，按月升約13%，而有關數字已經連升兩個月。至於涉及稅款約2,500萬元亦創出新高，按月更加急升約41.2%。

六月份須繳付SSD嘅二手成交中，要畀5%嘅SSD、即持貨逾一年但响兩年內轉售嘅個案仍然佔最多有121宗，比五月份多咗21宗，佔整體比例約87.1%，涉及稅款2,200萬元，即平均每宗稅款逾18萬元。

預期SSD盤買賣續升

至於持貨逾半年但一年內轉售（SSD為成交價10%）嘅個案佔約12宗，按月減少7宗；而半年內轉售（SSD為成交價15%）宗數，按月增2宗，就增加到6宗。

印花稅署舊年七月開始正式向有關人士徵收SSD（當中包括二○一一年七月以前出售而須繳付SSD嘅成交），到依家已累積確定580宗須繳納SSD成交，涉及稅款約1.095億元，平均每宗稅款近19萬元。

由於近期市況開始明朗，相信嚟緊會有更多辣招盤鬆綁，市場預期SSD數字將會繼續創新高。

花都扣稅仍賺30萬

事實上，唔少辣招盤業主見現時利潤唔錯，紛紛抓緊機會出貨套現。

中原陳永強話，粉嶺花都廣場9座高層C室以約255萬元賣出，呎價4,636元，原業主揸咗個單位約一年多，扣除5%嘅SSD後，帳面仍賺約30萬元。