市場徐想:盛高置地形勢不妙

上星期阿爺「突然」減息,內銀股應聲下跌,大戶細戶梗係先沽為敬啦!相反內房股就炒到飛起,不過盛高置地(00337)卻逆市而行,發盈警,市場嚇一跳。

過去幾年內房股面對住首期增加、限購令,經營環境真係好鬼惡劣。盛高做唔好其中嘅原因,原來盛高中咗房地產三大地雷之一限購令,因為盛高嘅項目大部分都喺長江三角限購令重災區,真係想賣樓都賣唔到幾多。

佢負債雖然唔算好高,但係短期現金又真係「窄窄哋」,加上評級公司又將佢評級下調,呢次真係屋漏兼逢連夜雨,在無計可施下,啱啱賣咗無錫地皮畀恒大(03333)許生,套現11.85億元,較市場估值仲要低。

內房股可唔可以回暖,實在言之尚早,溫總亦講明會繼續樓市調控,就算要博,都要搵大隻嘅來博,例如雅居樂(03383)或恒大。繼續追蹤,出發!

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!

港大電子金融服務榮譽助理教授 徐燦傑