牛熊對壘：睇淡港交所買14992

美國數據唔好，中國數據一樣差，六月份PPI下降幅度超預期，A股大散，滬綜指跌至2,170點，安碩A50（02823）跌穿10元收市，昨日股份沽空增至2.37億元，佔總沽空5.6%。

港股六月初以來反彈千多點，A50就逆市跌足咁耐，若短期未能反彈，下個低位要睇9.3元。跌得咁急，市場上可選擇A50的Put輪全部淪為價內輪，最低行使價嗰隻都要10.49元，較現價高出5%。但期間不少人衝入去博Call輪，總街貨量達24億份，Put輪街貨只有1.3億份咁多。

上周央行齊放水，投資者趁高走人，對七翻身不利。市場擔心經濟前景，至怕放水都救不了下沉的巨輪，上周尾最有叫座力的內房、內險股齊齊低頭。溫總一句不讓房價反彈，震懾人心，內房股實際較大市更早出現反彈，部分在五月中已掉頭由低位回升，高追後果有眼睇。

輪場生意難做，昨日窩輪成交跌至51.44億元，佔比12.2%，牛熊成交微跌1.9%，佔比為13.2%。上周五，恒牛總街貨22.63億份，熊證街貨略少，只有19.11億份，兩者重貨區街貨分別是12億份及11億份，好淡雖呈角力狀態。

整體氣氛未見改善

但整體氣氛實際無改善，波幅市未見突破，大戶着力大舉殺熊，飽食一頓之後，反手劏牛看來是合情合理，若投資者博貼價牛熊證，一定要留意收回風險，因恒指波幅指數目前處於20點之下的低位，未來波幅有機會擴大。

早前港交所（00388）公布了上半年的港股日均成交是566.97億元，七月以來，日日都係四舊幾，升市如是，跌市又如是，低迷的熊市何時了？無人知，加埋新股了無生氣，諗住低撈港交所的真要無比勇氣。

中央送大禮之一的兩地股市ETF，昨日有基金起動，推出「半直通車ETF」，但魚缸乾塘，無水又焉能養魚？港交所作為本港唯一股票交易所，但市場缺水，又要撲水應付天價買入的LME，伺機做Put值博率不低。港交麥銀沽（14992）明年一月三日到期，行使價105元，實際槓桿5.2倍。