Fundman睇市：A股前景毋須睇太淡

歐債盃之後，前晚輪到溫布頓，網壇費天王贏波重登網壇一哥王位，晨早投行老友笑言，可能睇波睇得夜，成條sales desk近半人告假玩失蹤。實情今年buy side、sell side都好，唔少對股市以至年底份花紅早就無期望，有老友更提早放暑假同家人共敍天倫，難怪個市成交愈玩愈縮，主板成交尋日得422億，比上星期五少67億。

看官或許會問，刻下股市既不旺丁，更不旺財的日子仲要捱幾耐？年初至今恒指得5.4%升幅，可是單睇藍籌股最叻嗰隻新世界（00017）升54%，最曳的聯通（00762）可以急跌38%，表現之兩極化，可見炒股唔炒市已經成為大趨勢。近期內地煤價跌通脹跌，內地電力股表現唔差，至於一直推介睇番高息股，恒指房地產信託基金指數（HSREIT）尋日仲創埋○八年以來新高，可見有主題故事配合，一樣可以發光發熱，股民亦唔需要太過悲觀。

內地通脹跌到廿九個月低位，六月份CPI得2.2%，比大行估計的2.3%更低，難怪上星期四人行可以早人一步，先行減息救經濟。但見人行減RRR、逆回購兼減息都救唔到股市，筆者反而對生產物價指數（PPI）更有興趣，六月份數字按年率計跌2.1%，創兩年半新低，內地製造業出廠價格持續下滑，可見製造及出口業毛利率薄過刀片（甚至見紅），對於以第二產業主導的中國經濟不利。

事實上，反映製造業出廠價的PPI，過往同A股走勢好似倒模一樣，上一浪PPI由○八年七月的10.1%，跌到○九年七月低位負8.2%，回落時間剛好一年，A股周期早些少開始，由○七年十月的6,124點，撻到落○八年十月1,664點見底，同樣跌足一年，只係A股比PPI行先大約三季時間。

今趟中國PPI在一一年七月的7.5%見頂，至今回落周期過咗十一個月，但中央再推四萬億救市無望下，下個月PPI調整周期是否會告一段落，筆者無水晶球唔敢亂估！睇番A股指數由一○年十一月頂位3,186點開始陰陰落，調整已超過一年時間，綜觀人行放水不遺餘力，加上筆者對歷史周期的迷信，故對A股或者中資股未來一季唔想睇得太淡。

雨潤短期神仙難救

本來隨着雨潤（01068）及雙匯（000895）等巨企出現，令市場主觀認為內地豬肉及加工行業，長遠可實現規範化，達到更高標準的食品安全。直到近年幾間肉企瘦肉精等醜聞不絕，加埋近期中國女排腳軟輸波，竟賴無安全豬肉可食，聽落好笑，但正正反映這個行業未有耐可以達到外國的安全水平。

雨潤創辦人日前宣布跳船，祝義材辭掉主席及執行董事等職，加上路邊社消息指政府補貼豬場的金額大減，看來八月派中期成績表解釋種種謎團之前，剛創三年半股價新低的雨潤，神仙難救。