股海實戰：領匯輕鬆跑贏大市

尋日內地公布嘅CPI及PPI數字，說明為何上周人行急急再次減息。可惜即使人行迅速反應，A股弱勢依然。港股方面，尋日恒指埋單唔見372點，收報19,428點，成交422億元。連放水呢招都冇刺激作用，難怪缸邊友話「哀莫大於心死」﹗

溫爺爺一句「絕不讓房價反彈」，令本來表現強於大市嘅內房股亦要調頭插水，內銀及內險亦全線走低。近日農行（01288）沽空明顯增加，尋日沽空比率達四成，提防「空軍」隨時開火，等再試上月低位2.88元先至再諗。此外，遭摩笛唱淡嘅中石油（00857）股價創今年新低9.47元，跌逾4%。

濠賭股面臨新競爭

對岸話要開賭，濠賭股立即發軟蹄，皆因好賭表叔多咗個好去處，可能會對濠江客源造成分流效應。雖然有大行力撐，話咁樣可以為濠賭股喺區內賭業帶來更多投資機會，但股價表現顯示投資者擔心未見其利先見其害。尋日提到嘅雨潤（01068）果然遭飛插，跌幅近一成，當事人喺分析員會議解畫，但未能令人釋懷，嚟緊公司股價易受負面消息影響，都係割蓆為妙。

環顧魚缸，眼前算得上穩陣嘅就係高息股，由於新政府上場後樓價未有大散，近月本地地主股由低位反彈，而具高息特點嘅房地產信託基金表現更跑贏大市，如置富（00778）及泓富（00808），現價均處於今年高位。

尋日領匯（00823）股價亦創五十二周高33元，收報32.85元，升0.61%。領匯主營公屋商場及停車場，管理嘅資產遍布各區，公屋商場消費受經濟放緩影響不大，加上公司不斷翻新物業，提升租金水平，相信今年盈利同派息都可以保持穩定增長，揸住領匯可以穩袋近4厘息又唔使食驚風散，怪不得見到近日有基金入場增持。至於話新政府會唔會私有化領匯，阿莊相信呢一刻新政府要急於展開嘅工作太多，私有化之舉暫未有迫切需要，即使真係要諗，似乎港鐵（00066）會排先過領匯！