樓市出更：滔哥個舖榮升第二貴租

金飾珠寶店繼續搶租銅鑼灣一線地舖，資深投資者黎永滔（滔哥）尋日同劉Sir報喜，佢九七年唔使半億元買入嘅羅素街一個單邊地舖，租客鐘錶珠寶店啱啱以220萬元續租，較前租飆升兩倍多，呎租以3,142元贏咗附近鐘錶舖呎租，一躍成為全港次高。

近年金行同埋鐘錶商戶瘋狂搶租銅鑼灣一線地舖，新租金動輒倍增，加上盤源少，業主普遍叫租十分進取。

滔哥話，上述羅素街59至61號與利園山道29至30號一個單邊地舖，現租客租咗兩年左右，當時租金唔算高，每月大約73萬元，由於區內希慎廣場就快開幕，附近人流將更加旺，所以之前都有其他鐘錶品牌想預租，不過，早前佢已經同現租客達成續租協議，每月新租金大約220萬元，以面積約700方呎計，呎租約達3,142元。

購入價計回報近60厘

滔哥笑住口話，以當時購入價計，租金回報差唔多60厘，而佢依家個舖市值起碼要10億元。

劉Sir睇番資料，喺上址附近一個由鐘錶店以每月140萬元租用嘅地舖，呎租約2,800元，已經係全港次高，依家滔哥個單邊地舖取而代之，不過，滔哥個舖與全港「舖王」景隆街雙號地下一個找換店相比，租金仍然差少少，現時「舖王」呎租差唔多3,600元。

油麻地舖2000萬放摸

核心區地舖唔憂租，亦唔憂賣，部分資金都流去二線區，早前夥拍投資者掃入荃灣區英皇娛樂廣場全幢嘅張姓投資者，尋日以1,120萬元買入土瓜灣九龍城道181號C舖；中原鄭得明亦話，有位投資者梁太啱啱以1,480萬元買油麻地廟街29至35號地下A舖，依家即刻開盤約2,000萬元放摸。

至於二線區舖位放盤續增，利嘉閣連秋成同劉Sir講，喺北角英皇道390至394號亞洲大廈地下A號舖連1樓全層同2樓部分推出放售，業主意向價兩億元。該行有份報告亦話，上個月商舖買賣登記達659宗，按月多近10%，不過期內總值就70.75億元，按月少逾15%。