市場徐想：瑞年協同效應有睇頭
阿爺送完大禮，市場又失去咗方向，炒股唔炒市開始大派用場。瑞年國際（02010）上市時長江生命科技（00775）已係股東，股價喺一一年坐滑梯衝咗落去，近期李生再次出手增持，有粉絲問Prof. J，李生入市有乜契機？
瑞年早前公布業績，銷售有三成增長，主席又不斷增持。雖然長江生命科技一來一回，持股量比IPO時候低，但正所謂生意不成仁義在，何況有關係？主席話會同李生嘅屈臣氏玩合縱連環，睇落又有一點睇頭，經由李生嘅關係入屈臣氏嘅現存銷售管道，確有一定程度的協同效應。
既然炒股唔炒市，咁應唔應該入呢？Prof. J睇過圖，星期三消息一出就「一棍震神州」，如果第二日佢一開已經喺上日最高價上，仲唔衝！不過，通常逆向思維確係冇得頂，星期四回吐加震吓，你走都預咗囉，Prof. J會以1.95元作為第一個止蝕位，跌破1.9元就全部走人。