牛熊對壘：國壽現突破吼18133

港股昨日先高開，後轉跌，再拗腰倒升，早段震倉意味濃，揸過夜或即市開倉都唔易做，主板成交都係咁奀，埋單得403億元，無意志真係好難玩落去。期指續高水，黃昏時人行宣布下調貸款利率0.31%及存款利率0.25%，恒指今日好好醜醜點都要衝吓兩萬關，但揸落牛證都要睇位走人，唔好快活不知時日過。

窩輪交投略增，成交額52.41億元，佔比由11.34%升至12.98%。前日勁升的和黃（00013）相當短癮，未能持續氣勢，昨日逆市微跌，但相關輪證人氣未減，成交額5億元，佔比9.59%，是最活躍的個股輪證。

至於一直是輪民至愛的內銀股，昨日續呈個別發展，招行（03968）升1.2%，表現最好，中行（03988）跌1%，跌得最多。內地傳出銀監擬取消現時75%貸存比率的硬性指標，但另一邊廂，高盛高華報告就指，內銀受到減息及定價能力減弱影響，淨息差受壓，故全線下調內銀目標價。即市觀察內銀輪證有資金流入，建行（00939）、中行及工行（01398）輪證活躍，同是十大活躍榜內。

牛熊力量不相伯仲

牛熊證昨日成交66.28億元，按日增加9%，佔比升至近期少見的16.4%水平，牛熊比例是56：44。前日恒牛街貨增加3.3億份，總數升至19.15億份，跟熊證總街貨21.64億份旗鼓相當，連重貨區街貨亦介乎10至11億份，實況是好淡爭持，力量不相伯仲。

昨日A股跌超過1%，滬綜指挨到2,200點邊緣，走勢弱過港股，部分同時在A股上市的H股，兩地價格計落所差無幾，要推港股ETF，你話吸引力大唔大呢？但A股昨日跌到一仆一碌，安碩A50（02823）可以平收，無升跌，即市仲見資金追入，情況異常，值得睇實。

今日A股市場相信都會好過昨日表現，國壽（02628）受惠市場氣氛轉好，股價升穿五月初頂位21元水平後，可望再下一城，中壽中銀購（18133）行使價22元，到期日今年十月十日，實際槓桿8倍。