Fundman睇市：瑞聲大把好消息跟尾

歐洲議息前，港股觀望氣氛濃厚，尚幸估歐洲減息的勇士為港股午後打氣，掃高港股99點，收報19,809點，惟主板成交奀到極，得403億元。大市欠缺焦點，即市炒家零星博近期落後的股份，好似李寧（02331）、南戈壁（01878）及周大福（01929）升勢悅目，可惜秤落各有缺點，只怕技術反彈完結後，又再悶死隔籬。

下星期祖國公布第二季GDP，由A股表現大致看到，投資者對當前中國經濟頗悲觀。瑞銀估計，上季經濟按年增長7.6%（環比升7%），創○九年首季以來新低。不過，六月開始人行連環透過提供流動性支持經濟的舉動，包括預期達8,000億元人民幣的新增貸款，以及固定投資回升的刺激，瑞銀估計通脹急速回落至接近2%水平，為未來進一步寬鬆政策提供更多空間。話口未完，人行尋日傍晚就宣布減息，揀星期四出招，陰謀論估計係夾埋歐央行齊齊出招。

擾攘多時，蘋果公司終於與深圳唯冠就商標糾紛傾掂數，廣州高院判蘋果支付唯冠6,000萬美元，以換取iPad商標於內地的使用權。早有分析員指，新iPad銷量首年可能達唔到市場預期6,600萬部的目標，撞啱可以返中國正式開售，相信一眾果粉及股東都可以鬆一口氣，而區區6,000萬美元，每部賣貴番一百幾十，條數都好快返嚟。

不得不提，有份生產iPad喇叭的瑞聲（02018），也間接受消息刺激，見過25.35元上市新高，可惜收市縮番落24.8元收，升1元。展望未來一季，聞樓梯響多時的iPhone5，應會推出迎戰三星的S3及新四核Galaxy Note，大把消息跟尾。技術上，只要升穿25元雙頂阻力，唔難見28至28.5元。

中國海外銷情樂觀

短期內中央政策有鬆無緊，近月內地準業主對入市興趣明顯增強，內房龍頭萬科，六月份銷售數字又一次超越市場樂觀預測，實現樓面及銷售額分別為122.4萬平方米及133.2億元（人民幣．下同），按月增長19.4%及24.2%。

目前為止，已有十一間本地掛牌內房股公布了六月份數據，平均銷售額錄得按月41%增長。值得留意，六月平均樓價回升3%，與五月削價1%以刺激銷量不同，樓市需求回升甚為明顯。龍頭股中國海外（00688）六月份數據未出，但首五個月已完成全年800億銷售目標的63%，按目前趨勢，加上六月同業紛紛報捷的銷情，中海下半年調高目標的可能性唔細。股價也多少反映優於同業的經營狀況，尋日收報18.24元，創兩年半收市新高，儘管股價跑先一步，但業績多年來不斷改善，一二年市盈率9.7倍，較之以往動輒二、三十倍來得合理，隨着一輪汰弱留強，內地壓抑樓市政策出盡，中海可望脫穎而出，也是睇好內地房地產發展加快的必選股份。