股海實戰：聯通現價乏值博率

歐洲央行議息前夕，港股交投縮減至僅404億元，但恒指曾一度抽穿250日線，最終挾高近百點收市，報19,809點，期指高水72點。執筆時傳來人行再次減息，一年期存款基準利率下調0.25%，一年期貸款基準利率下調0.31%，看來在各國政府加大力度放水下，魚缸氣氛可望獲得改善。

CY新政府擬增加興建公營房屋，一直參與公屋建築市場嘅中國建築（03311）自可受惠，加上公司正積極參與內地保障房建築市場，難怪今年以來股價跑贏大市，近月獲多家大行包括瑞銀、滙證及摩通唱好，尋日股價升4.9%，收報7.87元，睇勢有力挑戰去年高位8.54元。

體育用品股寒冬未過

體育用品行業正處水深火熱，龍頭企業李寧（02331）又再變招應對，高管大地震。阿莊相信，嚟緊行內大企業高管執位會陸續有來，大如李寧都話要用六至十二個月時間才有望將庫存回復至正常水平，睇怕其他二線同業情況更加堪憂，故別嫌阿莊長氣，持貨者宜把握每次反彈減磅，撈底未係時候。

今年以來，三隻內地電訊股之中，僅盈利穩定且享高息嘅中移（00941）表現像樣，聯通（00762）同中電信（00728）股價由今年高位分別累跌四成及三成。

上月底，聯通股價低見9.47元後現反彈，14日RSI明顯出現背馳，究竟係短線反彈，抑或尋底完成，目前下定論言之尚早，但有一點可以肯定嘅係，上月初聯通母公司收購西班牙電訊所持嘅4.56%聯通股權，鑑於西班牙電訊減持決定純綷出於本身嘅財務考慮，且承諾一年內不再轉讓餘下持股，故母公司接貨反可為聯通股價去除不明朗因素。

經營方面，須留意未來數月聯通嘅3G客戶淨增情況，若嚟緊增幅相對穩定，這可能顯示公司將焦點重新放喺盈利質素上。此外，喺20蚊3G卡推廣過後，公司嚟緊會否加大與內容供應商合作嘅力度，以催谷數據用量上升，亦係焦點。整體而言，預期股價會先喺9.5至11元水平整固一段時間，股價反彈至現水平，值博率一般。