樓市出更:名店縮沙廣東道大租撻Q

近年國際鐘錶及時裝名店在港瘋狂擴張,以高租金搶灘一線舖,聽講尖沙咀廣東道雙號地舖業主,為將地舖連樓上租比鐘錶店新租客,早前賠600幾萬元比現時化妝品店地舖租客,提早解約,不過,劉Sir收到風,新租客已「縮沙」唔租,令業主原本想將地舖同埋樓上打造成巨舖,以每月近700萬元租出嘅大計泡湯。

事實上,尖沙咀廣東道最旺一段嘅地舖,平均呎租都1,400多元,同舊年比升咗近九成,個別呎租更倍增至2,000多元,所以唔少業主都好心雄,個舖租期未到已經搵定新租客,租金加幅倍增更是必然。不過,科達地產主席湯君明有先見之明,早前已經同劉Sir講,依家一線地舖租金「見頂」,撻租潮係遲早嘅事。

言猶在耳,上述廣東道雙號地舖由化妝品店租用多年,月租50萬唔使,租期有近兩年先完,聽講業主早前同佢達成協議提早解約,條件係賠番剩低嘅月租租金等費用,金額差唔多600幾萬元,預計將上址同樓上部分一併打造面積5,000多方呎巨舖,最快今個暑假完前,將舖交畀鐘錶店新租客。不過,劉Sir聽到,上述單刁出現變數,個新租客有新部署,故決定「縮沙」唔租,搞到業主大失預算。

中環地舖名店突撤租

唔只九龍有大租撻Q,有代理報料,中環威靈頓街一個雙號地舖連低層部分,面積約3,000多方呎,有個時裝品牌以每月42萬多元租用,早幾日突然傳出取消租約,聽講要損失訂金逾100萬元,依家業主維持月租約42萬元再搵新客。

旺角短炒兩月賺500萬

雖然一線地舖有零星撻租事件,但就唔影響短炒舖位勢頭,香港置業林偉文表示,亞洲地產蔡志忠剛「摸出」旺角花園街107至123號B舖地下連閣樓,涉資大約5,080萬元,兩個月左右帳面速袋500萬元,賺幅超過一成。

此外,有個投資者分散資金,啱啱斥4,800萬元買中環結志街雙號地舖;亦有投資者以3,200萬元摸出將軍澳富康花園一個超市現用舖位。

搵樓18即睇最新樓價走勢、最全面地產新聞及筍盤情報

「Money18免費即秒股票報價網站」現推出8升級功能,財經資訊,實時實發!

劉Sir

廣東道街舖租戶多以國際鐘錶及品牌時裝店為主。(資料圖片)