股海實戰：光控具博反彈條件

內地魚缸動力不足，港股亦借勢抖氣，恒指微跌25點，收報19,709點。之不過，見到國企指數呢期力守五月中以來9,300點水平嘅平台支持，而反映A股走勢嘅中國人壽（02628）更一連升穿10日及50日線，喺黃金交叉利好訊號支持下，尋日一度升穿250日線，乃今年三月上旬以來首次觸及牛熊分界線水平，一隻弱勢股能有如此表現，並唔簡單。阿莊認為，目前圍繞內地魚缸嘅最大不明朗因素係十八大，此前經濟局面穩定顯得尤其重要，面對經濟增長持續放緩，適度放鬆銀根實有其必要，而此舉最終將有利魚缸表現，故料季內整體中資股表現可穩中有升。

前日買入短炒嘅中國神華（01088）表現唔錯，最高見過29.4元，以均價29.3元沽出食胡，賺約2.3萬元。至於早前沽出止蝕嘅聯想（00992），總算冇跳錯船，尋日股價低見6.01元，收報6.02元，沽空比率達到23%，反映空軍仍未肯收手，短線股價或須一如所料下試5.8元承接。

今年上半年港股IPO市場表現欠佳，皆因現成股票估值都甚為低殘，新股定價過低大股東未必首肯，定價過高又乏人問津。展望下半年，內地適度放鬆銀根對兩地魚缸有利，IPO市場亦有望獲得改善。執筆時聽聞講上市講咗N咁多次嘅光大銀行，將於周內決定招股進程，但據聞集資額將由去年原定嘅60億美金，削減至僅約18億美金，顯見時機一過，真係此一時，彼一時！

內地魚缸氣氛改善

講到光銀，又睇番持有光銀4.51%股權嘅光大控股（00165），公司近年旗下各項投資基金設立工作進展順利，據管理層五月份披露，公司總管理基金規模達200億元。截至去年底，光控手持現金及等值42.5億元，負債比率維持喺5.8%水平，財務狀況穩健，而公司旗下創投基金業務將步入收成期，為來年嘅盈利增長奠下良好基礎。此外，隨着中央力挺兩地金融合作，亦為公司帶來良好嘅發展機遇。

光控股價自今年二月高位14.84元回落至六月低位僅9.81元，累跌幅度超過三成，已反映上半年內地魚缸低迷對旗下內地證券業務嘅影響。買股票永遠係買前景而唔係買往績，喺預期下半年兩地魚缸交投有改善條件，以及公司旗下光銀上市計劃有新進展，相信季內光控股價有條件重上12至13元水平，喺10至11元水平可作部署。