樓市出更：非核心商廈唔憂賣

資金狂掃核心區商用物業，情況更蔓延到非核心區，單係近排已知道有4、5個項目斟到好埋或者已經成交，涉及金額合共至少30億元，其中去年曾招標嘅尖沙咀加連威老道同順興商業中心全幢，有代理同劉Sir爆料，啱啱有個客出價大約10億元洽購至尾聲，呎價超過1.9萬多元，高過市價。

有代理老友同劉Sir講，尖沙咀區好多全幢樓上舖生意都好好，所以之前標售嘅加連威老道20至22號同順興商業中心，早前不約而同有三、四組有興趣人士洽購，結果有個買家出價約10億元積極洽購，相當大機會成事。

幢樓地盤面積大約4,000幾方呎，總樓面差唔多5.2萬方呎，樓下有幾個舖，樓上係寫字樓。聽講原業主係老牌發展商，喺七十年代尾買入上址自己興建。

依家一線區全幢盤源少，唔少投資者都分散資金吸納非核心區物業。睇番土地註冊處資料，會德豐（00020）或有關公司嘅深井碧堤坊商場部分樓面，上月初錄臨時買賣合約登記，以2.8億元沽出。

麗港城商場 基金吼實

另外，市場有傳聞，有基金對恒隆地產（00101）或有關公司嘅藍田麗港城商場好有興趣，積極透過代理問詳情，市場估計上址市值約16億元。

另外，「玩具大王」蔡志明喺荃灣嘅荃灣豪華廣場全幢樓上舖，亦獲有興趣人士洽購至尾聲。

至於舖位方面，聽講旺角弼街一個連鎖化妝品店舖以約1.8億多元賣咗，呎價大約12萬多元，收租回報近兩厘半，原業主半年左右帳面袋2,600多萬元，而新買家依家即刻開價兩億多元放摸貨。

另第一太平戴維斯老友講，發展商Blake's賣咗中環荷李活道208至214地下A及B舖、與1樓A、B及D舖，金額大約1.18億元，呎價近1.1萬元，回報高近4厘。

小巴大王掃干諾道全層

商廈有價有市，向來投資舖位嘅「小巴大王」馬亞木，罕有咁以6,900萬元買入西環干諾道西188號10樓全層商廈。

另葵涌新都會廣場2座高層單位以呎價約7,500元售出，呎價創該廈新指標。