Fundman睇市：煤股博反彈首選兗煤

中美歐製造業數據唔掂，市場反而炒放水，環球股市食咗興奮劑，恒指昨升近300點，收報19,735點，但短期有兩大阻力位：250日線（19,875點）及兩萬點大關，而昨已反彈回之前累積跌幅的一半，所以升勢隨時告一段落。

美國數據欠佳反而有得炒QE3，而美國企業業績期又至，上個禮拜連Nike業績都令人失望，今期派成績表可能成地眼鏡碎。近期唯一搶鏡嘅係中國六月官方非製造業PMI升至56.7，其他內地經濟數據又就快公布，CPI話鐵定破三，人行昨逆回購1,430億人仔，下一步到減存款準備金率順理成章。

升市成交仍然唔夠500億元，相反沽空金額54億元，連日維持超過一成。CY上任首個工作日，地產股竟然最醒神，國壽（02628）升上20蚊蟹貨區樓上，並以全日最高位20.85元收市，反映短期氣氛相當不錯。防守股亦各自各精彩，領匯（00823）在內的4隻REITs齊創五十二周新高。

車股有排冇運行

至於下跌股都唔少，而跌得最慘嘅係汽車股，廣州繼北京、上海同貴陽之後亦實施限購令，最驚係其他城市陸續有來。前排公布汽車舊換新政策以商用車為主已感大事不妙，炒國策原來係「表錯情」，車股恐怕有排冇運行。

七月首先「翻身」嘅係煤炭股，水泥、鋼鐵同煤炭係上半年最慘澹嘅行業，尤其係今年夏天內地特別多雨水，搞到水泥價跌勢未止，上個禮拜再跌0.78%，加埋水泥股輪流發盈警，結果唔跟大市又唔跟內房股而獨自神傷。

煤炭股都唔好過，五月小陽春之後又連跌八周，環渤海5,500大卡動力煤已跌到每噸接近700蚊人仔，同中央封頂價已相差100蚊人仔。需求疲弱主要係內地電力增長放緩，另外多雨水亦有關係，令水力發電取代火電供應，而電煤庫存一直高企。

不過，昨日內地傳媒一段報道則令煤炭股「醜女大翻身」，報道話包括發改委在內的幾個部委正研究將合同煤同現貨煤價合併。講股佬講得多：兗煤（01171）以現貨煤為主，神華（01088）同中煤（01898）則賣合同煤為主，實際分別係通常現貨煤利潤較高，但合同煤就確保供需穩定。

阿爺出新招原因係近期內地煤價大幅下滑，現貨煤及合同煤價格愈走愈近，所以趁機會提出改革。但實際是否可行，仍係值得懷疑，就如煤電聯動講咗幾年都未能成事，今次改革需要配合電價有更大彈性，同時會受既得利益者反對。

無論點，煤炭股沉咗咁耐，股價已反映咗不利因素，淨係博反彈已大條道理。而煤炭價格亦接近見底，畢竟夏季係用電高峰期，連日本都要重開核電站。博反彈首選仍係兗煤，因為現貨煤為主嘛。