樓市出更：天價二線舖加租快夾狠

近排好多投資者或者財團都以理想價掃市區二線街舖，租金回報往往低到僅1厘，但由於一線街舖已差唔多無位，二線街舖都變得非常搶手，好多商戶都肯用高租搶舖，好似上個禮拜啱啱以近億半賣出嘅灣仔莊士敦道44至46號地舖，新買家已經即刻交吉放租，意向月租睇45萬元，同依家運動用品店租金比較，升幅超過兩倍，收租回報更加升到3.8厘，仲理想過啲一線街舖。

世邦魏理仕Karl Chan同劉Sir講，依家莊士敦道近港鐵站一段好旺，之前有個外國品牌租咗上址附近一個地舖，作為香港旗艦店，可見商戶對條街後市充滿信心。

上述莊士敦道44至46號舖，面積約1,700方呎，新買家買嗰陣租金回報得1厘，依家決定以每月45萬元放租，呎租大約260元，同上址現租金每月10多萬元比較，增幅超過兩倍，回報有3.8厘。睇番土地註冊處資料，上址上周錄買賣登記涉額1.436億元，買家為順緯有限公司，根據公司註冊處資料，該公司董事為WAN PAK KUEN。

手機商貴70%旺角搶位

有代理報料，幾間化妝品店唔捨得離開旺角步行街，寧願接受大幅加租，其中一間化妝品店以每月約180萬元，續租西洋菜南街一個雙號地舖；另一則以每月約80萬元續租同街雙號地舖，兩單續租嘅租金增幅都有一倍。另外，有個電話品牌首度落戶該街道，以每月約47萬元租咗一個約400方呎細舖位，新租金升幅超過七成。

講開旺角區，土地註冊處資料顯示，花園街旺角電腦中心商場賣咗10.18億元，買家係KINGSLAND ENTERPRISES LIMITED。據講原業主係新加坡基金，揸咗五年，帳面賺近2.7億元，賺幅超過35%。

油麻地巨舖 拆售叫億六

另外啱啱以逾2.7億元易手嘅油麻地彌敦道534號地下3A號舖，美聯旺舖話，新買家依家分間上址為兩舖，A舖叫價1.63億元放售，呎價大約9.5萬元。