股海實戰：南車具備突破條件

眨眼又到上半年最後一個交易周，次季魚缸表現令人失望，皆因歐債危機惡化，加上內地經濟不但未有回穩迹象，放緩勢頭更趨明顯，迫使上大人出招刺激消費同減息。展望第三季，相信季初魚缸仍然呆滯，但隨着刺激經濟措施發揮作用，加上季內人行有機會再次下調RRR及推出減稅措施，A股亦已多方位鼓勵海內外長錢進入，故第三季魚缸仍有望轉運，但回升動力有幾大，就要睇埋歐、美市場生唔生性！

繼恒大（03333）同聯想（00992）無端端被負面消息打擊之外，上周五又輪到創維（00751）因網上流傳負面消息而令股價受壓。上周五大市成交僅380億元，恒指埋單跌穿萬九點，市況疲弱，故見恒大同聯想股價雖已回穩，都彈唔起。阿莊見聯想基本因素冇大變化，所以諗住溝一注，喺6.6元排隊買入，但冇中過，本周初會繼續密切留意表現。

沽空監管有待加強

講開沽空呢個問題，卜架相告，今次寫恒大報告嘅Citron，其網站責任聲明講到明其相關人士可能會持有所述股份，但不會披露持倉或相關變化，只着投資者在決定買賣前自行進行市場評估。咁都得，難怪恒大形容遭遇如同被「搶劫」﹗依家環球經濟唔好，魚缸人心虛怯，股價易跌難升，空軍睇準形勢每幾個月就食一次大茶飯，監管當局無道理視而不見，應盡快檢討現行沽空條例，加強監管，以防大戶利用灰色地帶做市圖利。

個股方面，又睇番鐵路股。隨着鐵道部成功融資及重新招標機車項目，圍繞鐵路股嘅不利因素逐漸消除。有內地傳媒估計，今年上半年，鐵道機車定單約600多台，主要由南車（01766）同中國北車兩大龍頭瓜分。除咗鐵路機車外，配合城市化發展，城軌建設係大勢所趨，南車嘅城軌地鐵車輛需求亦值得憧憬，上月便成功中標長沙地鐵2號線訊號系統。

去年末季以來南車嘅股價走勢，說明公司已步出溫州動車事故嘅陰影，今年以來股價底部支持緩緩上移，向上則受制於6.3元。不妨留意，若來季有更多關乎鐵道部嘅新投資嘅數字出爐，南車股價有條件作出突破。其股價上周五收報5.77元，是浪調整守穩五月初低位5.45元有得諗，季內目標再試衝6.3元阻力位，5至5.2元乃主要承接區。