樓市出更：內街舖當炒兩月貴45%

受惠零售業暢旺，銅鑼灣呢幾年地舖做價升勢凌厲，即使二線街舖都被搶高至億億聲，連帶區內周邊街道嘅舖位，近期亦成為投資者覬覦目標，好似禮頓道希雲大廈有個地舖，喺短短約兩個月內已三度易手，做價累升咗近四成半；而同大廈有一個同類型地舖，都部署喺短期內推出拍賣，開價要600多萬元。

劉Sir近期喺土地註冊處資料見到，希雲大廈有個地舖，今年三月首先以約400萬元登記賣出，相隔不足一個月買家已成功將個舖以430幾萬元摸出，樓價升咗唔夠一成，今次承接嘅買家仲犀利，唔夠一個月再以570幾萬元賣出，賺幅高三成幾，帳面賺咗140幾萬元。據聞，個舖面積約莫300多方呎，即係呎價由約1.25萬元，一下子升到去約1.8萬元。

希雲多小店 月租五千

據一間拍賣行嘅資料，希雲大廈一個地舖將會喺短期內推出拍賣，開價600多萬元，呎價超過兩萬元，如果個舖成功以開價賣出，反映該地舖價值短短近四個月，累積升幅超過六成，升幅絕對唔輸蝕畀區內一線街地舖。

劉Sir早排落咗去希雲大廈睇過，大廈裏面有十幾間舖頭，店舖商戶包括廣告牌設計、縫製衣物等舊式小店等，街舖就有唔少食肆，其中從事招牌製作嘅租客余先生話，「以前喺灣仔告士打道金國大廈經營十多年，因被財團收購而搬到現址，現時已經營咗四至五年，月租約4,000至5,000元，雖然租金唔貴，但租約要每年簽一次，一旦大廈被收購，可能要搬走。」

聽地產代理講，由於炒賣商舖唔受額外印花稅措施影響，部分樓價幾百萬元嘅舖位受投資者注意，銅鑼灣霎東街及勿地臣街呢啲區內二線街道，過去一年地舖做價被搶至飆升。

渣甸坊舖半年3易手

除咗希雲大廈舖位之外，渣甸坊有兩個雙號地舖喺半年內三度易手，其中一個由800萬元，累升至910萬元，升幅近14%；另一個地舖就由600萬元，升到690萬元，累積升幅15%。