Fundman睇市：保利協鑫有短炒條件

希臘選民選擇苟且偷生，但西班牙銀行審核結果未出，美國議息前夕，港股繼續買賣兩閒，昨恒指升102點，收19,518點，主板成交414億，是超過兩星期以來最低。手執本文時，看官大約都知道聯儲局到底開扭曲操作（OT）抑或出QE，姑勿論邊個結果，分析員計過，六月中旬環球股市反彈，大致反映六至七成美國推QE3之機會。筆者深信經濟學的邊際遞減定律，聯儲局過去兩次QE，威力一次低過一次，目前美國十年債息得1.62厘，貼住歷史低位，再推低一厘半厘，對經濟與就業刺激作用有多大，大家心知肚明。以日本為例，十年債息貼住0.8厘水平一段日子，經濟一樣無起色，股市要更上一層樓，睇怕伯南克份禮物一定要相當驚喜兼別出心裁至有機會。

歐洲人一向最講環保，但自一場金融海嘯，歐洲多國政府對太陽能等產業補貼大縮水，潔淨能源概念股也由天堂跌入地獄。不過有危自有機，勢估唔到日本福島「三一一」大地震，引發嚴重核災難之後，日本國內反核聲音高漲。最近，日本政府落實推動可再生能源發展，透過政府電力收購制度（FIT），以較高價格購買再生能源，變相補貼私企及民間自建太陽能設備，再向電企售電，以減低日本對核電的依賴。

現時可再生能源在日本供電市場佔有率不到1%，業界估計，新政策下日本有機會取代歐洲，成為全球最大可再生能源設備買家，日本企業太陽能供電設備翹楚聲寶（Sharp），股價同上星期比較，最多升過一成五，香港上市多晶硅生產商保利協鑫（03800），未知最終受惠程度如何，但見近兩日升幅唔多，藉消息看來有短炒一轉的條件。

智能手機普及拉動數據用量，近年發達市場的手機網絡商，每客每月消費經過長時間壓縮，唔少已企穩或回升，香港電訊商過去兩年股價因而跑贏大市。

聯通捧場客死心

在政治任務下，中移（00941）要發展中國獨有的TD制式3G，手機及網絡配套不足，上客數字一直被聯通（00762）所壓過，然而，後者早前推超低價15元人民幣3G plan，經已夠晒驚嚇，剛公布五月上客數字，3G新客272.6萬，更創下今年新低。至於2G上客量按月表面看反彈8.5%至37萬，但出到3元任打plan才有此成績，情況殊不樂觀。聯通股價今年累積跌幅三成六，走勢之弱，連一度認為有機會博反彈的筆者，亦都對佢死心。

街外估聯通今年賺104.3億元（人民幣．下同），以首季只賺10億（連跌兩季）睇，第二季情況未樂觀（去年第二季正值高峰賺24.86億）。或者，好似美林報告所講，聯通市帳率接近1倍的歷史下限，可是再樂觀的預測，一二年市盈都講緊29.1倍，至少一季業績有起色前，暫時都可以唔使睇住。