股海實戰：東氣值得優先考慮

投資者觀望美國聯儲局會議結果，尋日港股交投持續淡靜，恒指反彈102點，收報19,518點，成交僅415億元。短線恒指須以大成交重上兩萬點樓上，始可確認轉勢，否則仍停留喺18,000至19,000點水平上落，咁嘅話就要做好抖暑嘅心理準備，等第三季美國總統大選前，奧巴馬政府做嘢先至再有運行。

尋日話要(目及)實大笨象（00005），果然股價有異動，升逾2%，但沽空比率達30%，睇嚟始終擺脫唔到歐債危機陰影，一想起動又惹來空軍虎視眈眈﹗此外，尋日話要翻兜聯想（00992），好彩早段有沽盤質到落7.22元，阿莊以平均價每股7.26元買入三萬股。至於提到炒家沾手落後二、三線股試水溫，尋日輪到永暉焦煤（01733）及中國秦發（00866），股價分別升23%及9%。

國家環保部上周發布《核安全規劃》及《核安全檢查情況報告》全文，並徵求社會意見，這被視為核電重啟可能已進入倒數期嘅先兆。若然要買核電股博一博，策略宜揀大唔揀細，正路選擇有東方電氣（01072）、哈爾濱電氣（01133）同上海電氣（02727），其中以東氣為首選，事關集團產銷規模大，產品覆蓋火電、核電、風電及水電等多元化領域，且在核島及常規島設備方面具優勢。去年集團盈利增長18%至30.5億元人仔，今年首季盈利同比增長20%至7.4億元人仔，盈利基礎較穩固。

概念股仔只宜跟炒

至於幾隻已獲內地核電相關企業入股嘅二、三線股，如中核國際（02302）、中核工業二三集團（00611）、中廣核礦業（01164）同銀建國際（00171），多半只係炒概念而缺乏與「核」相關嘅實際盈利數據支持，幾時注資同幾時開車，局外人無從得知。所以話，呢類股仔只宜等產業政策開綠燈，板塊交投明顯轉活時才入市跟炒。