樓市出更：銅鑼灣通街天價舖

近排唔少國際品牌排隊嚟銅鑼灣開舖，區內唔少業主已把握機會開天價放售手頭舖位。劉Sir收到風，區內另一「明日之星街道」蘭芳道，其中9號地舖啱啱連約放盤標售，業主叫價最少2.2億元，平均呎價14.6萬多元，若以呢個價賣出，將會係蘭芳道新指標。不過，由於上址依家仲係舊租約，所以租金回報唔高，只係近1.2厘。

品牌爭住來港開店掘金，所以銅鑼灣近排好多地舖都放售。第一太平戴維斯方詠清（Sharon）同劉Sir講，現放售嘅蘭芳道9號地下業主認為，蘭芳道將係區內另一焦點，所以上址意向價最少2.2億元，依家舖位分別由兩家時裝店租用，租金加埋約21.4萬元，暫時租金回報近1.2厘，個放盤下個月中截標。

睇番份土地註冊處資料，原來上址業主早喺九九年底以1,780萬元成交，買家係SPARKLING TOUCH INVESTMENTS LIMITED，即係依家叫價較購入價高逾十一倍，足見業主對上址嘅信心。事實上，早前已有投資者睇好蘭芳道，斥巨資入市，聽講兆安李太舊年以1.75億元，買入蘭芳道單號地舖，當時呎價11萬元。

近期中環擺花街好旺，唔少城中名人都入市，據土地註冊處資料，擺花街1號地下3、4及5號舖與有關樓面，早前以1.38億元「摸出」，買家係MAINFUL CONCEPT LIMITED，公司註冊處資料顯示，公司董事包括蘇合成，市場料該公司有機會同賭王何鴻燊四太梁安琪等有關。

景星1.4億摸售勁賺

近年政府工廈活化措施下，工廈炒賣極旺。據土地註冊處資料，喺葵興港鐵站附近嘅大連排道132至134號景星工業大廈，上個月剛以1.3億元售出，啱啱再錄得臨時買賣登記1.43億元，一個月唔夠原業主速袋1,300萬元，據公司註冊處資料，買家公司董事包括鄺海鑾等。

另萊坊國際話，同區青山公路301至305號一個工業地盤，依家交吉標售，市場估值大約1.7億元，比原業主三年前購入價高2.4倍，下月二十五號截標。