股海實戰：翻兜聯想博財息兼收

等到希臘大選有結果，又輪到西班牙搞搞震，打擊魚缸人氣。好友買完一浸都睇定啲先，淡友見歐洲局面愈嚟愈亂，各國政府出手救市嘅可能性增加，所以亦唔敢輕言再加淡倉，結果好、淡雙方按兵不動，魚缸買賣兩閒。尋日大市缺乏焦點，藍籌中表現較堅挺嘅有騰訊（00700）同中移（00941），個別發咗霉嘅二、三線股有炒家落場試水溫，可惜成交始終未配合，跟炒宜盡量走短線，身手要夠快！

港交所（00388）股價尋日終於有反彈，查實如今投行最大意見係港交所買LME嘅作價過高，但係買貴而唔係買錯，更何況交易有祖國祝福，似乎冇必要睇得太過悲觀。另一個支持港交所股價嘅因素，就係「七．一」中央送大禮，尋日傳來大禮之一乃推出前海金融創新改革，故見尋日尾市港交所有買盤掃上，相信待公司嘅再融資方案明朗後，股價可脫弱勢。

掃重磅股等ETF

此外，盛傳期待已久嘅港股ETF將於本月底推出，尋日騰訊同中移有大盤掃上，唔排除大戶有心壓住指數收集兩隻重磅股，若然如此，唔爭在(目及)實大笨象（00005）。

內地統計數據顯示，五月份社保QFII險資加快入市，新開16個A股賬戶。另一方面，人行進行嘅儲戶問卷調查顯示，與上季相比，居民投資（股票、基金、債券等）意願走低，按季下降2%。顯然，沒有散戶積極參與，內地魚缸即使有長錢流入維穩，但交投同走勢都尚未見大起色。阿莊都係嗰句，投資中國市場瘋漲歲月已成過去，投資要回歸基本步，眼光要放遠一點。

家電股可跑贏大市

講到人行呢份報告，當中亦提到居民未來三個月嘅購車意願為15%，乃九九年有調查以來嘅最高水平；購買大件商品（如電腦，家具等）嘅消費意願為26.2%，乃○九年以來同期嘅較高水平。以此推斷，有理由相信，第三季家電及汽車板塊表現應可跑贏大市。

主營消費電子產品嘅聯想集團（00992）一向係阿莊愛股，上月曾經打算喺7元樓下再上番車，但因為大市氣氛欠佳作罷。見該股喺6.5元水平找到支持，上周一連重上10日及50日線，前晚美股科技股氣氛唔錯，尋日聯想亦升2.5%，技術上10日線剛升穿50日線，黃金交叉發揮作用下，料可確認股價調整完成，再展升勢。咁啱阿莊前日沽咗新華保險（01336）套現，呢兩日會睇位翻兜聯想，呢轉睇8元應該冇失拖，睇啱邊嘅話揸到下月初仲可以博收埋股息（末期息每股0.1元將於下月五日除淨）。