樓市出更：代理行頂唔住要執笠

二手交投急跌，再有中型地產代理行結業，其中近年成立，喺高峰期曾經有10間分行嘅首域置業，至今只係剩番九龍站同奧運站總共數間分行，而部分分行尋日已關門，其中仍有開門嘅分行員工話，今日起該行會正式結業；而有同區代理行就話，會考慮吸納該行嘅員工。

劉Sir尋日去咗首域置業位於奧運站富榮花園兩間分行，其中一間細舖已經人去樓空；喺中午兩點左右，另一間可以坐到近廿人嘅大舖，都只得兩至三個員工，有舖裏面員工更直接同劉Sir講：「今日返工嘅等放工」。

另一位負責人亦話，早前正式收到通知，尋日係最後一日營業，暫時未收到任何新安排；而另外兩間分別位於九龍站同奧運站富榮花園分行，早前已先後關門。

首域全盛期有10分行

事實上，早前劉Sir都同該行負責人聯絡過，佢話其實今次結業，主要原因係老闆唔睇好後市，加上近日樓市交投集中喺新盤，二手交投大跌，所以決定暫時離場，餘下自置嘅舖位，將保留長線收租。據悉，首域置業全盛時期，在港曾有約十間分行，主要開喺港島及九龍豪宅區。

有鄰近奧運站代理爆料，近日已約見部分首域置業員工，希望吸納部分有經驗代理，但人數仍未決定；另外，市場亦有消息，上述兩間喺富榮花園分行，現時以每月約4萬元同9萬元放緊租。

奧運站二手交投跌幅驚人，香港置業文愛玲話，以前奧運站每個月閒閒地可以錄到過百宗二手買賣，但上個月全月都只係錄到35宗，今個月暫時更只錄得15宗，而月中打後已經連續四日都未有成交。

交投放緩主因係業主唔肯減價，買家見市況轉淡，唔肯接貨，加上內地客比例大減，所以成個區都靜晒！相反，區內樓價仍高企，好似西南九龍帝峯．皇殿7座有高層過千呎單位，賣咗成2,010萬元。

首域置業小檔案

高峰期分行數目：約10間

高峰期分行地點：港島、九龍站及奧運站

分行數目*：約3間

員工人數*：逾50名

分行分布*：九龍站及奧運站

*截至昨日