魚缸Blogger：國藥不乏利好因素
雖然希臘脫歐危機暫時大步檻過，但執筆時西班牙十年期債息高企七厘爆煲警戒線樓上，惟有寄望各國領導人盡快救市。至於本地魚缸尋日一開已見全日高位，各板塊表現乏善足陳，惟藥股走勢凌厲，國藥（01099）收市升近7%。
眼見近月廣藥（00874）同中國製藥（01093）升咗差唔多一個開，炒嘅無非係業務重組概念，而國藥本身同系嘅中國生物技術，貴為全球第四大疫苗同血液製品生產商，亦計劃來港上市，加上消息指內地稅局將延續醫藥行業廣告支出嘅扣稅優惠，且市傳藥監局加快審批新藥，多重概念下國藥應有再升空間，不妨待股價回試20蚊邊部署，阻力先睇22蚊。
國藥控股（01099）
阻力位：22元
支持位：20元