股海實戰：雨潤中長線諗得過

希臘大選有結果，但港股高開低走，部分內險同內銀股開始回軟，究竟係展開中期升浪前嘅震倉活動，抑或大戶逢高派貨，此刻阿莊嘅睇法唔係太悲觀，相信等過埋呢個幾禮拜，後市方向可逐漸明朗。

尋日見報推介中國製藥（01093）話咁快就拉閘，上周五升勢分明係春江鴨所為。另外，阿莊喺五月下旬開始買入嘅新華保險（01336），已連續三個交易日升抵32元樓上便掉頭回落，走勢轉弱，所以尋日決定先行食胡，以平均價31.3元沽出兩萬股，獲利6.3萬元，若然落番28至29元見支持，會考慮翻兜。

中資房企進軍本地

眨眼回歸十五年，往後日子香港將何去何從？阿莊相信，新政府無道理要推冧樓市搬石砸腳，但大地主暴利日子就幾可肯定已成過去，取而代之係回歸合理利潤時代。賺慣厚利嘅大地主減少發展項目亦唔出奇，但用家唔使擔心，事關嚟緊有內地房企補上，積極參與本地發展項目，就如繼今年三月特區政府兩幅土地招標由中資房企中標後，尋日又見到中國海外（00688）投得市建局重建項目，另今年以來見到招商地產同萬科分別買殼東力實業（00978）同南聯地產（01036），顯見樓市維穩力量已在靜靜布局。

個股方面，蒙牛乳業（02319）傳來好消息，公司獲農業部委任，參與丹麥食品及漁農業部嘅戰略合作。講到呢家前身係民企嘅公司，阿莊又諗起同屬民企嘅雨潤食品（01068），股價繼續喺低位浮沉，競爭對手雙匯近日又再傳出產品相關負面消息，搞到整個板塊淡風揮之不去。

豬肉相關加工產業對中國食品市場影響不亞於乳業，但偏偏產業發展未成熟，問題頻生。若然再有大事件發生，最終會唔會步乳業後塵，由國企出手參與全面整頓，提高產業發展層次，始能步入坦途？以目前內地肉類工業前三企業佔有率合共不到一成，與歐、美嘅八成以上相比差一大截，顯然未來政策必須積極加快推動行業高度集中。從呢個角度睇，雨潤仍然係一隻好值得長線投資者留意嘅食品股。如無意外，今年公司業績可望步出谷底，唔介意其民企身份嘅話，中長線值得認真考慮。