樓市出更：銅鑼灣二線舖嗌到3億

近月銅鑼灣迷你舖成交呎價逼近90萬元，加上區內收購氣氛濃厚，有貨嘅業主叫價都好心雄，好似鄰近時代廣場嘅勿地臣街15號地舖，依家業主招標意向價約3億元，同佢廿年前嘅購入價，高出約42倍，而呎價亦達約30萬元，若果以呢個呎價賣出，將會係條街嘅新高，同時租金回報一厘都唔夠，叫價都好進取。

近期銅鑼灣唔少舊樓地舖趁機放盤，一個千幾呎地舖，索價以億元計，惟無損買家承接意欲，有代理話，依家銅鑼灣具收購潛力地舖，只要業主肯賣，唔憂無買家。

勿地臣街舊樓 財團入貨

中原（工商舖）徐康達（Stanley）同劉Sir講，上述標售嘅勿地臣街15號地下，面積大約1,000方呎，業主早喺九二年初以685萬元買入，一直長揸收租，不過見近排附近接連有多個地舖以過億元高價售，自己都心郁郁，故決定連約放售，意向價約3億元，呎價約30萬元，下月十七日截標。

Stanley話，由於上址佔該廈業權份數約六分一，極具收購價值，故意向呎價要30萬元，若新買家能統一全幢，再重新發展，以區內零售前景睇，係物有所值。消息稱，上址由地下至5樓組成，早排永義國際（01218）及有關公司斥6,200萬元，收購勿地臣街15號2至5樓一批物業，相信已持有該廈唔少業權。

銅鑼灣靚舖買賣涉資近億元，據土地註冊處資料，區內渣甸街41號地舖錄買賣登記涉額9,900萬元；區內伊榮街21號物業亦錄買賣登記涉額6,250萬元。

由於區內地舖為名店必爭之地，業主都善價而租，有代理話，怡和街有個歐洲名錶租用地舖，依家月租都係100萬元左右，租約出年到期，業主諗住加租一倍。

駱克道舖摸出 3日賺10%

荃灣區零售氣氛日增，大鴻輝興業主席梁紹鴻話，早前斥逾6億元，向張姓投資者等以確認形式買入嘅荃灣英皇娛樂廣場地庫兩層同1至3樓共5層，已經攞埋個大廈命名權，初步或者將上址改名為「大鴻輝荃灣廣場」，依家嗰5層月租大約131萬元，將會再分間1樓全層及重整5層嘅租戶，料新月租可升至200萬元。

據悉，亞洲地產蔡志忠剛以約4,380萬元「摸走」灣仔駱克道地舖，約三日帳面賺約430萬元，賺幅一成。