股海實戰：海通現價上車未算遲

魚缸見水即生！西班牙終於求助，歐元區出手亦相當慷慨，一批就1,000億歐元。歐元區此次「鬆章」，可阻止進一步受狙擊，但卻惹來其他「歐豬」不滿，視為「大細超」。另外，距離希臘大選仲有唔夠一個禮拜，歐債危機隨時又有變數。昨恒指急升451點，升幅高於其他亞洲股市，差47點可重上萬九點關口，且期指罕見高水11點，今個禮拜相信仍係蜜月期，而希臘人普偏希望留在歐元區，夠膽的話可以博到下周一。

航運股高追要諗過

唔單止西班牙有袋鹽水可以吊命，中國五月份進出口數據，亦遠比四月為佳，五月新增貸款亦冇原本預期咁差。不過，有分析話五月工作天比舊年多一日，而四月比舊年少一日，一加一減之下，實際並非如數據表面咁好，而且五月PMI新出口定單指數繼續下跌，PPI更跌得離譜，所以出口仍未能樂觀。但無論如何，航運股及碼頭股昨借勢大幅反彈，呢類股今年始終都係盲門，低吸可以一諗，但高追就無謂囉。

青蛙王子（01259）先跌後微升，總算暫時止血，民企股上演高台跳水已見慣不怪，今次係遭受一封聲稱來自內地基金界之匿名電郵襲擊，總之民企股有親衰嘢就寧可信其有，另一特徵係「出事」前股價反而處於強勢，青蛙王子於四月開始「逆市」由2.6元附近升至五月尾約3.6元，雨潤（01068）舊年被狙擊之前亦係強到無倫，先托高股價、高位沽空、出狙擊報告，其實早有部署。昨又有泰凌醫藥（01011）停牌，涉及匿名信指其做假數，民企風暴愈近八月愈危險，因為又到業績公布期。

兩隻內地券商股中信証券（06030）及海通證券（06837）近日跑贏大市，兩間公司五月盈利分別較前一個月升17%及77%，但主要是憧憬內地有證券業創新政策出台，自從中證監由郭樹清出任主席之後即大力改革資本市場，券商憧憬可以鬆綁，日後可參與經營財富管理、直接投資、私募基金等業務，亦即「投行化」，唔使好似依家要靠佣金食飯咁淒涼。

海通昨日剛重返招股價樓上，未來市場空間同發展空間仍然很大，現價上車絕對未算遲。