樓市出更：華蘭中心問鼎最貴工廈

過去廿年，鰂魚涌成功轉型為全新商業區，區內未重建嘅舊式工廈都成為財團垂涎嘅目標，其中華蘭中心有個頂層連罕有空中平台嘅工廈單位，依家放盤每方呎意向價最少1萬元，叫價逾9,000萬元，有代理同劉Sir講，從未聽過工廈單位呎價過萬元，若果以呢個呎價賣出，將會貴絕全港工廈。

鰂魚涌區雖已發展成具規模嘅新型甲級商廈群地帶，但區內仍有唔少具重建價值嘅舊工廈有待發展，而業主亦知道區內舊樓「有價有市」，唔會平賣，叫價亦非常進取。

商廈林立 具重建價值

利嘉閣（工商舖）梁嘉榮（Keith）話，華蘭中心24樓頂層單位業主，啱啱決定放賣上址，現時單位已經交吉，業主之前做晒功課，知道依家非核心商業區物業做價高，所以上址每方呎叫價最少要1萬元。

有代理同劉Sir講，兩年前同區長華工業大廈有個連天台單位以約3,565萬元賣咗，當時呎價已超過7,000元，創本港工廈呎價新高，呢兩年工廈樓價升幅明顯，上述呎價可以過萬元都唔出奇。

據利嘉閣資料，是次華蘭中心頂層面積大約9,183方呎，最特別係依家放盤單位包埋空中平台花園，Keith話，成個放售項目大約佔全幢業權份數約2%，至於業主早喺○四年期間，唔使3,000萬元購入，相對現時叫價計，即係高出超過兩倍。

近年工廈有價有市，唔少投資者都可以短炒獲利，萊斯物業蔡旻熹話，新蒲崗華懋工廠大廈1樓剛以650萬元賣咗，呎價約2,167元，原業主唔使一年半，帳面就賺咗200萬元，賺幅超過47%。有代理話，炒住宅受額外印花稅限制，點計期內同區都唔會有物業可以咁短期賺咁多。

廣華街31舖連約放售

工廈大刁方面，睇番土地註冊處資料，葵涌恒亞中心12至14樓一批工廈單位錄成交登記金額2.5億元，原業主係香港寬頻網絡，買家係宇正有限公司，原業主售後租回物業，租期五年，月租近113萬元。

至於近期市場當旺嘅舖位，美聯旺舖呂炳坤話，旺角廣華街1號仁安大廈地下潮流地域31個舖連約放售，入場費約300萬元。