市場徐想：六福潛力不容忽視
近年隨住金價日漲，金飾當然水漲船高啦，金舖亦開到成行成列。六福集團（00590）主要售賣各類黃鉑金首飾、黃金裝飾品、鑽石首飾、寶石及其他配飾。集團植根香港，本土市場一向係主要獲利來源，佔集團總收入約72.8%。
內地旅客嚟香港消費，一向只買幾樣嘢。點解要行到咁遠買？只因一個字：「真」！愈昂貴嘅嘢，內地同胞就愈要嚟香港買，皆因要減低風險也！集團呢幾年亦都受惠國策，尤其係一○年十二月實施嘅常住深圳非廣東籍居民「個人遊」計劃，令到來自旅客嘅銷售額持續增加。
中國經濟增長強勁，令集團業務獲益不少。去年度集團喺中國市場方面嘅收入佔總收入約17.3%，增長63.9%。公司憑藉香港經營嘅知名度，成功將品牌打入內地市場，未來盈利貢獻值得令人憧憬。睇番數據，集團上年增長約七成，市盈率約九倍！繼續追蹤、出發！