股海實戰：TCL多媒體強勢有理

美股前晚反彈，港股得以繼續回升，但開始出現疲態，恒指最高見過18,845點，午後內地股市唔爭氣，恒指最終收報18,678點，升157點，成交477億元。執筆時傳來人行調低存貸利率各0.25個百分點，相信呢次行動可確認中央政策已由「抗通脹」變為「穩增長」，好友可以來次大反擊﹗

睇尋日A股表現，今次阿爺減息保密工夫真係做得幾足！事實上，今年首兩季內地經濟表現未盡人意，今年上半年中資企業嘅業績都係「瓜多過菜」，特別係去年上半年比較基數較高，「盈警」轟炸將不絕於耳。好似尋日收市後安徽海螺（00914）發通告，指預計半年盈利同比將降五成以上。中央要力挽狂瀾，如今只希望出手唔係嚟得太遲！

產品組合持續優化

中央再對家電業提供財政補貼，家電股一回就要買。TCL多媒體（01070）近年積極推銷LCD電視，去年公司喺全球LCD電視機市場佔有率為4.9%，喺內地電視機市場嘅佔有率就達到15.6%，其中LCD電視機喺內地市場佔有率為14.9%。隨着產品組合持續優化，其LED背光液晶電視銷售量佔整體及內地LCD電視機銷量比重均逾四成，食正消費潮流，業務發展形勢大好。

公司首季賺3.09億元，其中包括收購TCL光電科技（惠州）而產生嘅一次性收益約1.44億元，扣除特殊項目，仍賺約1.65億元，同比增逾三倍，並約相等於去年全年純利嘅三分之一有多。聽講旗下有259款LCD電視機入圍節能補貼名單，鑑於首五月旗下LCD電視總銷量同比增72%，公司決定上調全年LCD電視機銷量目標至1,520萬台，即較去年銷量1,086萬台高出近40%，顯見對今年嘅銷售前景信心十足。今年以來股價跑贏大市係合情合理，相信年內股價將可維持強勢，計及有特殊收益嘅因素，預測一二年度純利可達7.8億元，即現價市盈率7.6倍，估值仍屬吸引，揸住呢隻國策股既可避險，亦可博財息兼收！