樓市出更：品牌爭插旗舖租有排升

近年亞太區經濟起飛，區內消費力強勁，唔少外國時裝品牌都爭住嚟亞洲掘金，香港更加係必選地方，當中以美國品牌最活躍，其中以悠閒服飾為主嘅Tommy Bahama已決定首度登陸香港零售市場，租咗港島一個六千幾呎嘅地舖大展拳腳，佢哋董事總經理彭樂殷（Brian）同劉Sir講，雖然香港舖租好貴，但前景好好，仲諗住未來四年喺香港開4間分店。

內地豪客頻頻來港血拚，消費力仲愈來愈高，所以唔少國際品牌都睇準時機，爭住來港開舖吸金。

大額租務 首開店佔11%

仲量聯行陳耀峯同劉Sir講，原來過去二十四個月，月租喺50萬元以上嘅單一舖租成交中，超過11%來自新進駐嘅品牌，數字反映外國品牌睇好本港市場；零售市旺，舖租自然水漲船高，佢認為今年首季一線地區舖租升4.5%，相信全年有10至15%升幅。

尋日Tommy Bahama嘅Brian為咗讓大家了解多啲佢哋個品牌，特別搞咗個時裝表演。Brian話，公司睇好亞洲市場，所以之前已經喺澳門同新加坡開咗分店，下月再喺日本開新店，而內地上海市亦會係佢哋北望神州嘅首選城市。

佢又話，公司對香港時裝市場好熟識，响廿年前已在港設立採購部門，覺得依家係最適當時候開舖，所以之前租咗一個地舖小試牛刀，至於租咗邊度，佢就話賣個關子，下個禮拜先講；不過有人估計佢哋有機會响灣仔落戶。

洗衣街地舖嗌兩億

睇番近幾年美國真係有好多時裝大品牌來港吸金，其中最矚目要算係FOREVER 21，佢哋一口氣承租銅鑼灣京華中心地庫至3樓，面積共約5.1萬方呎，月租達約1,100萬元。

本港一線區舖位搶手，市傳新世界（00017）將中環新世界大廈地下扶手電梯旁一個位，間咗個兩層舖，面積約1,500方呎，意向月租約150萬元。另外，香港置業簡元鎧話，位元堂（00897）或有關公司放售旺角洗衣街135A至135B號華懋王子大廈地下4至5號舖，意向價睇約兩億元。