股海實戰：騰訊營造小雙底

兩地魚缸交投淡靜，人氣不足指數反彈亦要打個折，特別係呢兩、三個禮拜歐債危機隨手可以找來沽售藉口，要提防彈到咁上下淡友又會再發功。

國際金價自上周五升穿每安士1,600美元後未見大回，金礦股持續反彈，周二提及嘅招金礦業（01818）再升一成，短線升到上50日線10.9元或要先行整固，及後若能以大成交突破，可確認重納升軌。此外，周一提及嘅粵海投資（00270）表現亦唔錯，由於公司派發末期息每股0.11元今日除淨，尋日好明顯有搶息活動，高位見5.59元，收報5.4元，升3%。

住建部話要及時制止地方放鬆樓市調控行為，但內房股時運高聽唔到，遠洋地產（03377）同保利香港（00119）均掃高半成，其他普遍升2至3%。阿莊聽來自上海嘅表叔朋友話，之前上海樓價一直企硬唔肯跌，但到咗近兩個月都開始投降，豪宅樓價降幅唔少都有四、五成。睇見咁嘅情況，阿莊唔覺得阿爺仲有需要出重招打擊樓市，只須讓市場自行調節，配合陸續有保障房落成滿足基層需要，房市調控可到位，捱過第二、三季嘅低潮，有望喺更健康嘅基礎下成長。

煤炭股呢期玩跳水，龍頭神華（01088）股價由五月初高位35.1元回落至尋日低位只有25.05元，累計跌幅達到28.6%；同期兗煤（01171）及中煤（01898）累跌幅度亦分別達到30%及28%。油價亦唔好得去邊，同期紐約原油價格跌幅亦有兩成三。市場需求下降令資源價格大跌，但隨着主要資源價格都顯著下跌，仍留喺市場嘅用家成本壓力可得到紓緩，配合政府穩增長措施，相信可為下半年經濟增長重新提速帶來有利條件。

經濟不穩因素漸消

事實上，隨着通脹及內房泡沫受控，其實內地經濟經已去除咗兩個重大不穩定因素，實不必要過分睇淡，只係大家亦要接受一個現實，就係中國市場發展漸趨成熟，已由過去大起大落，而變得相對平穩，內銀股估值回歸基本步係一個好例子（現時市帳率已回落至介乎0.8至1.5倍）。審時度勢，投資者看待中國股票，宜減少短炒行為，多重視中長期回報。

此外，尋日見到騰訊（00700）股價重上10日線，收報216.2元，升3.7%，14日RSI上升動力增強，且過去三周似喺203至204元營造小雙底，後市若能以大成交重越50日線224元可望喘穩；但若然再次調頭回落並插穿203元，則宜耐心等候下試250日線190元才作考慮。