樓市出更：觀塘工廈爆搶貨

觀塘區喺過去十年無全新工廈推出，而區內鴻圖道35號天星中心全新工貿項目，發展商早前放風，部分標準單位呎價會達約八千元，成為東九龍最貴工廈。唔少工廈買家都話預咗區內樓價勢水漲船高，上個星期就已經有客偷步入市，部分呎價創新高，其中利寶時中心高層單位上周以約286萬元沽，呎價逾5,100元，創該廈呎價新指標。

有代理同劉Sir講，上述利寶時中心高層單位，面積560方呎，買家早前喺區內搵工廈單位自用多時，有感天星中心將售，加上首批單位開價進取，上個星期即拍板以286萬元購入利寶時中心高層單位，呎價5,107元，係該廈呎價新高。

廣生行一周加價11%

另同區幸運工業大廈高層單位，早前獲兩組買家積極查詢，其中一個唔想錯失單位嘅買家，上周搶先以約357萬元購入單位，面積約1,150方呎，呎價達約3,104元，為該廈近年新高。

美聯工商營業董事吳偉華（Tony）話，天星中心正式開價一個禮拜唔夠，觀塘工廈二手業主叫價即刻轉強，依家區內工廈業主加價幅度大約6至11%，其中，放盤幾個月嘅廣生行中心中層單位，最新意向價約6,400萬元，呎價約4,000元，較一周前開價調升約11%；另外，同區航天科技中心中層單位業主索性封盤。

乙廈漲租14%贏甲廈

近排港島乙級寫字樓租金回勇，睇番差餉物業估價署嘅資料，今年四月中區乙級寫字樓平均呎租約66.5元，按月大升超過14%，呎租仲係嗰區同類歷來最高。

但同月中區甲級寫字樓平均呎租只係95.3元，按月跌1.8%，同區甲、乙級寫字樓平均呎租差幅顯著拉近至只30.2%。至於該月乙級寫字樓租金指數就錄得179點，按月升1.5%，而甲級指數就跌穿190點，按月跌0.8%。