股海實戰：招金可望重拾升軌

外圍風聲鶴唳，港股亦難獨善其身，恒指最低曾見18,056點，又有一批牛仔被宰。午後大市反彈乏力，恒指最終收報18,185點，跌372點，成交518億元，期指低水241點。由於上周五紐約金價創三年來最大單日升幅，金礦股逆市上升，而論跌市奇葩，唔少得好似食咗神藥嘅廣州藥業（00874），股價升10%，真係信者得救！

尋日大市裂口低開，即使做淡友，要追沽亦難落手。奢侈品股一如所料低處未算低，周大福（01929）尋日再創上市以來新低8.55元，六福（00590）創五十二周新低14.84元。

內地豪客絕迹名店

阿莊上星期特登去行吓尖沙咀名店街，發現平時有一百幾十人喺門口排隊嘅名牌包包店，竟然冇咗條人龍！係內地各省市開多咗名牌包包店，表叔們唔使長途跋涉來港消費？抑或內地經濟唔好，少咗富貴表叔來港買嘢？若然呢個情景唔係偶然，而係趨勢，咁香港經濟就真係幾令人擔心！事實上，唔單只香港，濠江市道亦有放緩迹象，上周公布完數據後，博彩股全線大飲茶。

本周澳洲、歐洲及英國央行議息，美國聯儲局將發表經濟褐皮書。究竟魚缸幾時會有大冚倉出現，就要睇各國政府會唔會聯手做番啲嘢。美匯指數尋日高見83.15，股、匯齊挫，唯獨金價繼上周五急彈後繼續靠穩。歐債危機發展令人擔憂，加上美國就業數據轉差，可能觸動聯儲局考慮推出QE3救市。金價急彈，亦意味市場預計全球主要央行或再開動印鈔機，黃金嘅抗通脹和避險功能再次受到市場重視。

心水清嘅讀者，應該記得阿莊上周一講過，金價落到每安士1,500美元水平，調整幅度差唔多，果然話咁快就重上1,600美元樓上，尋日現貨金報1,616美元。金礦股之中，紫金礦業（02899）之前有唔少負面消息，印象上失分；若以黃金產銷同儲量、營運透明度及購併潛力作比較，招金礦業（01818）較之優勝，股價與金價走勢聯動性亦較大。唔嫌價位較大，中短線仍以招金為首選。

走勢上，招金股價由今年高位累跌五成，若然下半年金價穩步回升，其股價有望完成調整，步出谷底。尋日逆市升6%，收報9.39元，成交明顯增加至1.35億元，估計短期會先喺8.8至10.5元水平整固打底，大成交重上50日線（現處約10.97元）可確認重拾升軌。