樓市出更：周啟邦夫人轉戰工廈豐收

自額外印花稅出籠以來，住宅短線炒賣幾近絕迹，唔少大孖沙都轉投工商舖，好多都賺錢賺到笑住走，其中，社交界名人周啟邦夫人近期積極入市工、商舖，啱啱又「摸出」荃灣ONE MIDTOWN 21樓全層工貿物業，涉資差唔多6,290萬元，短短半年帳面就賺超過208萬元。

美聯工商助理營業董事彭潔儀（Kitty）向劉Sir報料，向來活躍於社交界嘅名人周啟邦夫人周譚月清，近排喺荃灣、觀塘同埋黃竹坑入市掃貨，轉手都可以賺錢離場，可見佢眼光獨到。

Kitty話周啟邦夫人啱啱摸出嘅ONE MIDTOWN 21樓全層，單位擁無敵全藍巴勒海峽景致，加上面積夠大，差唔多約1.7萬方呎，屬於區內罕見，是次成交價約6,286萬元，呎價約3,620元，屬於區內理想水平，持貨約半年間帳面賺逾3%。

藝人兩億掃觀塘樓花

事實上，周啟邦夫人近排購入嘅工商物業都賺錢離場，例如舊年年中佢摸出黃竹坑One Island South中層全層商廈，涉資近2.4億元，大約四個月速賺近5,300萬元，帳面賺幅近逾28%。

另外，近期物業投資市場旺及工貿物業，美聯工商陳偉志表示，第一集團嘅觀塘鴻圖道35號工貿樓花盤，標準單位已售逾八成樓面，據悉，其中5至9樓，與27樓及28樓獲演藝人士斥逾兩億元掃入，個別單位呎價差唔多7,536元，高過區內唔少商廈做價，而買家仲有埋個大廈命名權，並啱啱命名為天星中心。

事實上，今年到依家，香港物業投資市場算唔錯，唔少大行生意都豐收，第一太平戴維斯同劉Sir講，公司嘅投資部今年頭五個月促成物業成交金額差唔多92億至93億元，同舊年全年大約125億元比較，生意已經唔錯。

不過，由於歐債問題一波未完、一波又起，反映外圍經濟認真麻麻，危機四伏，大家下半年買貨都係要審慎啲，其中以商舖最為令人擔憂，依家個價炒到咁高，好易出現連鎖式撻訂。

至於一線商舖方面，據土地註冊處資料，銅鑼灣波斯富街108至120號地下A舖及B舖，與1樓及2樓部分錄臨時買賣登記11.42億元，買家為KING PROSPER TRADING LIMITED，公司註冊處資料顯示，該公司董事包括劉軍等。

荃灣地舖1.3億天價售

近排商舖買賣旺，連民生區舖都屢錄億元成交，據土地註冊處資料，荃灣兆和街23號海晴軒地下12號舖及一樓亦錄得以1.3億元易手。