股海實戰：粵投攻守兼備宜傍身

上周五滙豐及官方公布嘅內地製造業PMI指數均遜色，內地經濟增長放緩嘅事實毋庸置疑，唔少投行都認為內地調低貸款利率嘅可能性增加，但見當日A股並未因為憧憬減息而現亢奮式上升，顯見內地股市已到咗一個平衡點，嚟緊中央必須好好把握出招時機穩住大局，一旦錯失，只怕往後再落重藥救市效果亦要打折。所以阿莊認為，六月魚缸亦危亦機，歐債危機問題明朗化嘅話，兩地股市可望迎來政策市，月內低點可以𥄫實國策股表現。

講番本周市場焦點，相信不離周二開始申購嘅第二批政府iBond。全球魚缸不濟，IPO表現令人失望，即使係廣為人熟悉嘅「面書」亦不例外，唔少散戶慕名上車，結果慘變「艇中人」﹗難怪多咗投資者調動資產買債收息避險。

中國金石避之則吉

舊年三月才在港上市，專門產銷大理石石材及相關產品嘅中國金石（01380），當時招股價2.25元，掛牌首一個多月股價最高見過2.4元，之後就展開「尋底之旅」，上月股價創新低0.265元，最多累跌88%。見舊年公司有公布季度數據，但喺今年三月公布完年度業績後，至今未見公布季度數字，上周五更傳來公司首席財務官請辭，股價即插7%。睇見呢啲咁嘅格局，當自己時運高睇佢唔到就最自保。

國指新貴新華保險（01336）上周五喺指數基金掃貨下，股價逆市升1.2%，收報29.65元，正考慮係短炒沽出獲利抑或繼續持有。早前提過嘅中芯（00981），上周股價跌穿0.25元，低見0.244元，市帳率僅0.39倍，真係睇到耍手兼擰頭！魚缸風雨飄搖，無謂同錢作對，揀番啲大路高息股傍身實際啲！

好似傳統紅籌粵海投資（00270），供水業務現金流高，收益有保障。上周管理層表示，旗下嘅天津天河城購物中心項目，因地鐵建築延遲而將延至一六年竣工。現時內房氣氛差，項目延後發展亦未必係壞事。另外，管理層明言將着手整理收費道路及橋樑業務，以優化業務結構，未來集中發展水務同商業地產業務，實行去蕪存菁，大方向正確。上周粵投收報5.16元，往績市盈率十倍，息率3.5厘，攻守兼備。走勢上，短期4.8至5元具承接力，向上主要阻力喺5.5至5.8元區域。