樓市出更：樓上舖好炒3日賺18%

近排唔少資金都轉咗去炒舖，劉Sir發現尤其旺區一線購物街樓上舖最熱鬧；好似坐落喺旺角最旺街道西洋菜南街嘅銀城廣場，喺近兩個多月就錄到16宗樓上舖成交，多過去年全年，個別舖位喺三日內已摸出，帳面勁賺約48萬元。

劉Sir收到風，以美容、Gel甲同電話飾物等店舖為主嘅銀城廣場，近月連環錄得多宗樓上舖成交，部分更出現極速炒賣情況。據土地註冊處資料，喺過去兩個多月，個商場總共錄到約16宗舖位買賣成交，仲多過舊年全年嘅成交量，當中最少有三個舖位係極速轉手摸出。

極速摸售即袋48萬

資料顯示，銀城廣場一樓一個單號舖位，喺月前以約320萬元轉手，短短三日後即以約368萬元轉手，帳面大幅升值約48萬元，升幅約15%，認真和味。

而同層兩個相鄰舖位，喺月前獲同一投資者分別以約125萬元及約135萬元購入，其中以約135萬元購入嘅舖位，持有僅約三日便成功以約160萬元摸出，帳面勁賺約25萬元，賺幅達18.5%。至於另一個舖位亦約五日內以約145萬元摸出，帳面亦升值約20萬元，升幅約16%。

呎價逾5萬新指標

另外，曾經多次透過私人拍賣場推出拍賣嘅上述商場同層一個單號舖位，亦都喺月前沽出，成交價約138萬元，按該舖實用面積約27方呎計，呢個舖嘅呎價高逾5.1萬元，相信係樓上商場舖嘅新指標；而上手業主買咗約一年，轉手賺約46萬元，升值約50%。另一個同層雙號舖亦以約400萬元成交，價值足夠買一個500方呎嘅市區二手樓。

近年舖位投資氣氛愈來愈瘋狂，日前更有銅鑼灣波斯富街地舖，以每呎高近90萬元易手，寫下全港舖位呎價最高嘅紀錄。有代理朋友話，內地個人遊持續上升，不但為本港零售業帶來龐大支持，更加令一線區舖位價值水漲船高，而唔少樓上舖位亦連帶被睇高一線。