牛熊對壘：友邦走勢硬淨吼15703

內地發改委話唔會再好似○八年咁用4萬億元人仔救市，令港股尋日借勢回吐，收市跌365點。雖然睇走勢，恒指喺18,600點水平好似有唔錯嘅承接，但跌市主板成交增加到553億元，令人覺得有啲不安。外圍方面，西班牙銀行嘅問題令該國信貸違約掉期（CDS）升到歐元區成立以來新高，真係一波未平一波又起，港股升唔起其實都係理所當然。

尋日一共有14隻牛熊證打靶，當中3隻係和黃（00013）牛證，另有3隻牛證分別屬於中石油（00857）、聯通（00762）同中移（00941），其餘6隻為恒牛，兩隻為恒熊。其實以上數據，正係弱勢股嘅側影，當中聯通因為預料ARPU會繼續跌，尋日仲創過五十二周新低。而目前牛仔街貨主要集結喺18,200至18,400點，涉及6.1億份街貨。

資金流方面，近期走勢轉弱嘅中移、滙控（00005）及和黃Call輪持續受追捧，當中中移購證在截至二十九日的五個交易日共錄得1,724萬元嘅資金流入。

國美博反彈唔划算

另外，日前公布業績後反覆向下的國美（00493），其Call輪五日共錄得549萬元的資金流入。雖然國美現價已經好低殘，但因為基本因素實在麻麻，加上市況不就，要博反彈都要等一段時間，買Call輪嘅投資者要留意時間值損耗。

雖然近期嘅國際金融股受外圍不穩影響而反覆向下，惟近年在亞洲新興市場發展不俗的友邦（01299）則相對強勢，該股佔恒指的比重將於周五收市後上調，相關指數基金需要買貨。

瑞信最近發表報告指，友邦股價近期回落，主要反映市場對大股東AIG減持的憂慮，但目前風險回報已變得吸引，故將其評級上調至跑贏大市，目標價31.5元。

友邦股價昨日雖然先升後回，但在逆市中仍能夠平收，走勢尚算硬淨。若看好此股，可吼友邦荷合購（15703），行使價26元，溢價6.4%，實際槓桿13.2倍，此輪雖然年期較短，但勝在人氣旺盛。