Fundman睇市：紅酒價急插佳釀有燶味

天價上市的facebook，短短幾日市值已經蒸發超過250億美元。前晚道指升過百點收市，以為港股可以威多陣，點知未到六月經已飛霜。發改委否定「新四萬億」的預期，強調中央唔會再重複○八年大規模刺激經濟計劃，港股跌365點，收18,690點，幾近把三連升的升幅嘔凸，六月期指大低水380點，計埋除息影響都低水111點，期指客恍如世界末日一樣，要錢唔要貨，一周前「大沽空日」，沽空佔大市成交14.6%，創十三年新高，尋日14.3%，乃年內第二高，395隻股票遭沽空。

睇月曆唔難理解淡友點解齊齊膽生毛，歐央行會議六月五日才舉行，仲有成個禮拜真空期，中國拒絕救市，憂慮歐元區因為希臘搞到解體收場的悲觀想法，像疫病一樣擴散。尋日，西班牙十年期國債孳息升到6.54厘半年新高，歐元插到1.2435見兩年新低，真係見到個市都唔開胃，趁機走去會展睇紅酒展覽，見人頭湧湧好不熱鬧，唔通眾劉伶朋友同筆者一樣，要借酒消愁？

查實歐債危機爆發後，法國消費信心未好過，上個月跌落負33低位，追蹤全球最具代表性一百支波爾多佳釀的Liv-ex100指數，去年六月報364，依家得289，累積跌幅20.6%，加埋歐元兌美元由一年前的1.45至今累跌14.2%，換句話靚酒價計埋匯水，一年插咗三成二，恐怕嗒落唔單止有橡木桶味，仲有些少燶燶地嘅味道。

越秀系重組，越秀地產（00123）向越房（00405）注入廣州國際金融中心項目，連債項涉及134.4億元人民幣，由賣與買雙方股價一升一跌，可見表面有削肉還母之嫌的交易，市場第一個觀感係母公司着數啲啲。表面上，收購作價有一成三折讓，而越房本身得五個項目，收購有助豐富投資組合，不過37.8億元市值蛇吞象買廣州IFC，美林估計大約令越房淨現值（NPV）攤薄約6%，估計廣州IFC一八年貢獻到大約5.9厘回報，但由越房現價計，等於去年派緊7.46厘息，亦難怪基金用腳投票，先沽而後快。

重鋼吸引力遜同業

同日另一宗蛇吞象交易，重慶鋼鐵（01053）以68.06億元（人民幣．下同）向母公司收購長壽新區鋼鐵生產相關資產，當中5.38億以現金，餘額以每股3.14元發行不超過19.96億股A股支付，意味交易九成二代價透過印公仔紙擺平。但話時話，重鋼去年蝕14.7億，重組消息曝光前，大行估計今、明兩年依然要見紅，而收購資產要孭埋107.3億債務，若非有篤手指的安排，試問何德何能可以啃得落？

或者收購可對重鋼業績有即時幫助，但從貪平角度而言，目下馬鋼（00323）、鞍鋼（00347）等資產折讓閒閒地去到五成，重鋼收購折讓一成唔算吸引，賭鋼鐵股死貓彈，肯定唔會揀佢。