股海實戰：越秀地產真正贏家

呢頭歡歡喜喜，嗰頭就大盆冷水照頭淋！期指結算日恒指大插300幾點，好友當然冇癮！之不過，若然班大戶真係繼續大手做淡，照計前晚歐股表現唔係太差，大可挾高加開淡倉。再睇雖然內地官報叫大家唔好諗多咗，但擺到明嘅事實係中央放水加快基建、補貼家電同汽車消費，唔係救市係咩？近幾日阿莊四出打聽行情，據中資行卜架講，表叔大戶喺度買緊貨。所以暫時唔使太灰心，睇多幾日始下判語。

越秀地產（00123）及越秀房託（00405）前日復牌，前者向後者注入廣州IFC。因停牌期間港股下跌，故見前日兩者復牌後股價略跌，尋日越地股價始見真章，高位見1.92元，收報1.89元，逆市升3.85%；反觀越房則再跌3.5%，收報3.55元。

越地折讓價將廣州IFC注入越房，對越房小股東有利，而交易完成後，越地亦相應增持咗越房股份，又可套現兼減債，係一家便宜兩家着。但見股價一升一跌，事緣今次交易總代價134億元（人民幣．下同），包括項目股東貸款45億元，以及股權代價88.5億元，其中12億元會向銀行舉債、不超過54.5億元會以發行代價基金單位配售集資（其中36%將配予越地），另不少於24億元向越地發行遞延基金單位。

咁講法，越地可透過是次債務轉讓套取現金淨額40億元，財務報表亦可錄得5至7億元收益進帳，喺目前內房流動性仍然緊張之下，不用賤賣項目益外人，亦唔使捱息舉債，透過資產重組，既可改善自有財務狀況，亦可備留財力增購平地，越地肯定係贏家，股價做好係合情合理！

越房長線亦有利

至於越房，獲折讓價注入優質商業項目唔係壞事，只係嚟緊要向銀行舉債同增發基金單位集資以完成交易，不排除短期表現較遜色，但長遠交易應屬正面。

總括而言，進取一族當選越地，收息一族若然呢段時間唔想坐越房，但又想繼續收高息，同系嘅越秀交通（01052）市盈率唔到九倍，都有6.5厘息，派發末期息0.14元將於下周四除淨，美中不足係交投較疏落。